ആടുവളര്‍ത്തലിലൂടെ മാത്രം അതിജീവനത്തിനുള്ള വക കണ്ടെത്തുകയാണ് വിധവയായ ഒരു അമ്മയും അവിവാഹിതരായ രണ്ട് പെണ്‍മക്കളും. പേരൂര്‍ ചെറുവാണ്ടൂര്‍ ചാമക്കാലയില്‍ ഭവാനിയും രണ്ടു പെണ്‍മക്കളുമാണ് 50-ഓളം ആടുകളെ പോറ്റുന്നത്. പ്രായവും ആരോഗ്യ പ്രശ്‌നങ്ങളും തളര്‍ത്തിയ അമ്മയും പ്രായാധിക്യവും അധ്വാന ഭാരവും പേറുന്ന അവിവാഹിതരായ പെണ്‍മക്കളുമാണ് വരുമാനത്തിനായി ആടുകളെ പോറ്റുന്നത്. ഏറ്റുമാനൂര്‍ നഗരസഭ പരിധിയിലെ 29-ാം വാര്‍ഡിലാണ് 91 എത്തിനില്‍ക്കുന്ന ഭവാനിയുടെയും മക്കളായ സരസമ്മയുടെയും ഉഷയുടെയും അതിജീവനത്തിനായുള്ള ആടുജീവിതം.
50 ഓളം ആടുകളെയും ആട്ടിന്‍കുട്ടികളെയും ആണ് 13 സെന്റിലെ വീടിനോട് ചേര്‍ന്ന് ഇവര്‍ വളര്‍ത്തുന്നത്. പാല്‍ വിറ്റു കിട്ടുന്ന ചെറിയ വരുമാനത്തിലാണ് ഈ മൂന്നാളുകളുടെയും ജീവിതം. അമ്മയ്ക്കുള്ള മരുന്നു വാങ്ങുന്നതിന് 400 രൂപയോളം ഇവര്‍ക്ക് പ്രതിദിനം വേണ്ടിവരും. മൂത്ത മകള്‍ സരസമ്മ പാടത്തു പോയി പുല്ലു ചെത്തിയെടുത്തും അയല്‍പക്കത്തെ പറമ്പുകളില്‍ നിന്നും ശേഖരിക്കുന്ന പ്ലാവിലകളും കഞ്ഞി വെള്ളവും കാടിവെള്ളവും ആണ് ആടുകള്‍ക്കുള്ള ഭക്ഷണം. സഹോദരി ഉഷയ്ക്കാണ് ആടുകളുടെ പരിപാലന ചുമതല. നേരത്തേ കൂടുതല്‍ ആടുകളെ വളര്‍ത്തിയിരുന്നെങ്കിലും ഇപ്പോള്‍ അനാരോഗ്യം മൂലം എണ്ണം കുറഞ്ഞു. പാടത്തെ ഇഴജന്തുക്കളുടെ ഭീഷണിയെ അതിജീവിച്ചാണ് സരസമ്മ ആടുകള്‍ക്കുള്ള തീറ്റപ്പുല്ല് കണ്ടെത്തുന്നത്.
.jpg)
0 Comments