സമ്പൂർണ്ണ തുടയെല്ല് മാറ്റിവെക്കൽ മാർ സ്ലീവാ മെഡിസിറ്റി പാലായിൽ വിജയകരം

സന്ധി മാറ്റിവെക്കൽ ചികിത്സാരംഗത്ത് മറ്റൊരു ചുവടു കൂടി വെച്ച് മാർ സ്ലീവാ മെഡിസിറ്റി പാലാ. 72 വയസ്സുള്ള രോഗിയുടെ തുടയെല്ല് പൂര്‍ണമായും, അതോടൊപ്പം ഇടുപ്പും കാൽമുട്ടും ഉൾപ്പെടുന്ന ഭാഗങ്ങളും വിജയകരമായി മാറ്റിവെച്ചു. അത്യപൂർവമായ ഈ ശസ്ത്രക്രിയയ്ക്ക് ശേഷം രോഗി അടുത്ത ദിവസം തന്നെ നടന്നു തുടങ്ങുകയും, അഞ്ചാം ദിവസം ആശുപത്രിയിൽ നിന്ന് ഡിസ്ചാർജ് ചെയ്യുകയും ചെയ്തു.

അർബുദചികിത്സയുടെ ഭാഗമായി ഏതാനും വർഷങ്ങൾക്ക് മുമ്പ് ഇടുപ്പും തുടയെല്ലിന്റെ പകുതിയും മാറ്റിവെക്കേണ്ടി വന്ന രോഗിക്ക്, പിന്നീട് ജോലിയുടെ ഭാഗമായി ദീർഘനേരം നിൽക്കേണ്ടി വന്നതിനെ തുടർന്ന് വീണ്ടും വേദന അനുഭവപെട്ടു. പല ചികിത്സകളും നടത്തിയിട്ടും വേദന കുറയാതെ വന്നപ്പോൾ മാർ സ്ലീവാ മെഡിസിറ്റിയിൽ നടത്തിയ പരിശോധനയിൽ മുൻപ് സ്ഥാപിച്ചിരുന്ന കൃത്രിമ സന്ധിക്ക് ഇളക്കം സംഭവിച്ചതായും തുടയിലെ എല്ല് ദ്രവിച്ചതായും കണ്ടെത്തി. ഇതിനെ തുടർന്ന് സങ്കീർണ്ണമായ തുടയെല്ല് മാറ്റിവെക്കൽ ശസ്ത്രക്രിയ നടത്താൻ ഓർത്തോപീഡിക്സ് വിഭാഗം സീനിയർ കൺസൾട്ടന്റ് ഡോ. രാജീവ് പി.ബി നിർദ്ദേശിക്കുകയായിരുന്നു.

മനുഷ്യ ശരീരത്തിലെ ഏറ്റവും നീളം കൂടിയ അസ്ഥിയാണ് തുടയെല്ല് അഥവാ ഫീമർ. ഇടുപ്പ് സന്ധിയും കാൽമുട്ട് സന്ധിയും തമ്മിൽ ബന്ധിപ്പിക്കുന്ന ഈ അസ്ഥിയിലേക്കാണ് കാൽ ചലിപ്പിക്കാനുള്ള നിരവധി പേശികൾ ബന്ധിപ്പിച്ചിരിക്കുന്നത്. അതിനാൽത്തന്നെ, തുടയെല്ല് നീക്കംചെയ്ത് കൃത്രിമ അസ്ഥി ഘടിപ്പിക്കുന്നത് അതിസങ്കീർണ്ണമായ ഒരു ശസ്ത്രക്രിയയാണ്. തുടയിൽ ഉണ്ടാകുന്ന അർബുദം പേശികളിലേക്കും ഞരമ്പുകളിലേക്കും വ്യാപിക്കാൻ സാധ്യതയുള്ളതിനാൽ, അവ നീക്കം ചെയ്യുമ്പോൾ അതീവ ശ്രദ്ധയും പരിചയസമ്പത്തും അനിവാര്യമാണ്. അല്ലാത്തപക്ഷം, അർബുദം അതേ ഭാഗത്ത് വീണ്ടും വളരാനുള്ള സാഹചര്യം ഉണ്ടാകാം. ശസ്ത്രക്രിയയ്ക്ക് ശേഷം രോഗി ആയാസരഹിതമായി നടക്കാൻ പേശികളും ഞരമ്പുകളും ശരിയായി പുനസ്ഥാപിക്കേണ്ടതുണ്ട്.

ഓർത്തോപീഡിക്സ് വിഭാഗം സീനിയർ കൺസൾട്ടന്റ് ഡോ. രാജീവ് പി.ബി. യുടെ നേതൃത്വത്തിൽ മൂന്ന് മണിക്കൂർ നീണ്ടുനിന്ന ശസ്ത്രക്രിയയിൽ, അനസ്തീഷ്യ വിഭാഗം സീനിയർ കൺസൾട്ടന്റ് ഡോ. അനു ഗംഗാധരൻ, ഓർത്തോപീഡിക്സ് വിഭാഗത്തിലെ ഡോ. സിബിൻ സൈഫുദ്ദീൻ എന്നിവർ പങ്കാളികളായി. 

അർബുദചികിത്സാരംഗത്ത് പുതിയ സാധ്യതകൾ തുറക്കുന്നതോടൊപ്പം, കാൻസർ കെയറും ഗവേഷണവും സംയോജിപ്പിച്ച മാർ സ്ലീവാ കാൻസർ കെയർ ആൻഡ് റിസർച്ച് സെന്ററിന് ഒരു നാഴികക്കല്ലാണ് ഈ ശസ്ത്രക്രിയയുടെ വിജയം.