കിടങ്ങൂര്‍ ശ്രീ സുബ്രഹ്‌മണ്യസ്വാമി ക്ഷേത്രത്തിലെ തൈപ്പൂയ ഉത്സവം ഞായറാഴ്ച നടക്കും.

കിടങ്ങൂര്‍ ശ്രീ സുബ്രഹ്‌മണ്യസ്വാമി ക്ഷേത്രത്തിലെ തൈപ്പൂയ ഉത്സവം ഞായറാഴ്ച നടക്കും. പുലര്‍ച്ചെ നാലിന് നിര്‍മാല്യ ദര്‍ശനത്തോടെ ചടങ്ങുകള്‍ക്ക് തുടക്കമാകും. തുടര്‍ന്ന് അഭിഷേകവും ഉഷ:പൂജയും എതിര്‍ത്ത പൂജയും നടക്കും.രാവിലെ വിവിധ കരകളില്‍ നിന്നും പാല്‍ കാവടിഘോഷയാത്രകള്‍ ക്ഷേത്രത്തിലെത്തും.

 മറ്റക്കര കോവൂര്‍ ശ്രീധര്‍മ്മശാസ്താ ക്ഷേത്രം, കിടങ്ങൂര്‍ സൗത്ത് വീരഭദ്രസ്വാമി മീനാക്ഷിയമ്മന്‍ കോവി എന്നിവിടങ്ങളില്‍ നിന്നും പാല്‍ക്കാവടി ഘോഷയാത്രകള്‍ നടക്കും. കുമ്മണ്ണൂര്‍ നടയ്കാംകന്ന് ക്ഷേത്രത്തില്‍ നിന്നും കിടങ്ങൂര്‍  ക്ഷേത്രത്തിലേക്ക് കാവടി ഘോഷയാത്ര നടക്കും.വൈകിട്ട് കിടങ്ങൂര്‍ ശിവപുരം ശ്രീമഹാദേവ ക്ഷേത്രം,കിടങ്ങൂര്‍ സൗത്ത് കാളിയമ്മന്‍ കോവില്‍,  ഉത്തമേശ്വരം ക്ഷേത്രം തുടങ്ങി വിവിധ ക്ഷേത്രങ്ങളില്‍ നിന്നും ഭസ്മക്കാവടി ഘോഷയാത്രകള്‍ ക്ഷേത്രത്തിലെത്തും. രാത്രി എട്ടിന് ഭസ്മാഭിഷേകം നടക്കും.സുബ്രഹ്‌മണ്യന്‍ താരകാസുര നിഗ്രഹം നടത്തിയ ദിവസമാണ് തൈപ്പൂയം.താരകാസുരനുമായി ഭഗവാന്‍ യുദ്ധത്തിലേര്‍പ്പെടുന്ന സമയം വ്രതമെടുത്തിരുന്ന ഭക്തര്‍ അസുരന്റെ വധത്തിനുശേഷം സന്തോഷം പ്രകടിപ്പിച്ച് കാവടി അഭിഷേകം നടത്തി സുബ്രഹ്‌മണ്യനെ പ്രീതിപ്പെടുത്തുന്നുവെന്നാണ് വിശ്വാസം.