വിദ്യാര്‍ത്ഥി ഹരിതസേന സ്‌കോളര്‍ഷിപ്പ്- ഇക്കോ സെന്‍സ് ശുചിത്വ പഠനോത്സവം നടന്നു

വിദ്യാര്‍ഥികളില്‍ ഉത്തരവാദിത്വമുള്ള ഉപഭോക്തൃ സംസ്‌ക്കാരം, ശാസ്ത്രീയ മാലിന്യ പരിപാലനം, മാലിന്യത്തിന്റെ അളവ് കുറക്കല്‍ തുടങ്ങിയ വിഷയങ്ങളില്‍ താല്പര്യം വളര്‍ത്തിയെടുക്കുക എന്ന ഉദ്ദേശ്യത്തോടെ  വിദ്യാര്‍ത്ഥി ഹരിതസേന സ്‌കോളര്‍ഷിപ് - ഇക്കോ സെന്‍സ് ശുചിത്വ പഠനോത്സവം പാലാ നഗരസഭ  ടൗണ്‍ ഹാളില്‍ നടന്നു. വാര്‍ഡ് കൗണ്‍സിലര്‍ ബിജി ജോജോ അധ്യക്ഷത വഹിച്ച യോഗം നഗരസഭാ ചെയര്‍പേഴ്‌സണ്‍ ദിയ ബിനു പുളിക്കകണ്ടം ഉദ്ഘാടനം ചെയ്തു. 

ക്ലീന്‍ സിറ്റി മാനേജര്‍ ആറ്റ്‌ലി പി. ജോണ്‍ സ്വാഗതം പറഞ്ഞു. തുടര്‍ന്ന് സ്‌കൂളുകളില്‍ വിദ്യാര്‍ഥികള്‍ നടത്തിയ മാലിന്യ സംസ്‌കരണ പ്രവര്‍ത്തനങ്ങളുടെ റിപ്പോര്‍ട്ട് അവതരണവും പാഴ് വസ്തുക്കള്‍ ഉപയോഗിച്ച് നിര്‍മ്മിച്ച വിവിധ തരം വസ്തുക്കളുടെ പ്രദര്‍ശനവും മത്സരവും നടന്നു. ഒന്‍പത് സ്‌കൂളുകളില്‍ നിന്നായി ഇക്കോസെന്‍സ് സ്‌കോളര്‍ഷിപ്പിന് അര്‍ഹരായ എഴുപതോളം വിദ്യാര്‍ഥികള്‍ പരിപാടിയില്‍ പങ്കെടുത്തു. ഉച്ചയ്ക്ക് ശേഷം നടന്ന സമ്മാന ദാന ചടങ്ങില്‍ വിവിധ സ്റ്റാന്‍ഡിങ് കമ്മിറ്റി അംഗങ്ങളായ രജിത പ്രകാശ്, പ്രിന്‍സി സണ്ണി, ബിജു വരിക്കാനി, ടോണി തൈപ്പറമ്പില്‍, ജിജി ബൈജു കൊല്ലംപറമ്പില്‍, തുടങ്ങിയവര്‍ വിദ്യാര്‍ത്ഥികള്‍ക്ക് സര്‍ട്ടിഫിക്കറ്റുകളും ട്രോഫികളും സമ്മാനിച്ചു. പരിപാടിക്ക് പൊതുജനാരോഗ്യ പരിസ്ഥിതി പരിപാലന വിഭാഗം ഉദ്യോഗസ്ഥരായ ക്ലീന്‍ സിറ്റി മാനേജര്‍ ആറ്റ്‌ലി പി ജോണ്‍ , സീനിയര്‍ പബ്ലിക് ഹെല്‍ത്ത് ഇന്‍സ്‌പെക്ടര്‍ ഉമേഷിത പി. ജി. പബ്ലിക് ഹെല്‍ത്ത് ഇന്‍സ്‌പെക്ടര്‍മാരായ സോണിമോള്‍ ഇ. പി., രഞ്ജിത് ആര്‍ ചന്ദ്രന്‍, മഞ്ജു മോഹന്‍, ശുചിത്വമിഷന്‍ റിസോഴ്‌സ് പേഴ്‌സണ്‍ ഡോ: ഗീതാദേവി ടി. വി., യങ് പ്രൊഫഷണലായ അല്‍ഫിയ താജ്, കെ.എസ്.ഡബ്ല്യു.എം.പി. എഞ്ചിനീയര്‍ ശ്രുതി  എസ്. നായര്‍, തുടങ്ങിയവര്‍ നേതൃത്വം നല്‍കി.