തെരഞ്ഞെടുപ്പിന് 8 ദിവസം മാത്രം ബാക്കിയിരിക്കെ പ്രചരണം ഊര്‍ജിതമാക്കി മുന്നണികള്‍.

തദ്ദേശ സ്ഥാപനങ്ങളിലേക്കുള്ള ആദ്യഘട്ട തെരഞ്ഞെടുപ്പിന് 8 ദിവസം മാത്രം ബാക്കിയിരിക്കെ പ്രചരണം ഊര്‍ജിതമാക്കി മുന്നണികള്‍. ശബരിമല സ്വര്‍ണ്ണ മോഷണവും രാഹുല്‍ മാങ്കൂട്ടത്തില്‍ വിഷയവും വോട്ട് ചോരി വിവാദവും നാടെങ്ങും ഉയരുന്നുണ്ടെങ്കിലും തദ്ദേശ തെരഞ്ഞുപ്പില്‍ പൊതുവേ പ്രാദേശിക പ്രശ്‌നങ്ങള്‍ക്കാണ് പ്രാധാന്യമേറുന്നത്. തദ്ദേശ തെരഞ്ഞെടുപ്പില്‍ കഴിഞ്ഞ തവണത്തെ മേല്‍ക്കൈ നിലനിര്‍ത്തുക എന്ന ലക്ഷ്യത്തോടെയാണ് LDF പ്രചരണം ശക്തിപ്പെടുത്തുന്നത്. പെന്‍ഷന്‍ വര്‍ധിപ്പിച്ചതടക്കമുളള ജനകീയമായ നടപടികള്‍ LDF ന് ഗുണകരമാവുമെന്നാണ്  നേതാക്കള്‍ പറയുന്നത്.

CPIM, CPI, കേരള കോണ്‍ഗ്രസ് M എന്നി പ്രമുഖ ഘടകകക്ഷികള്‍  കഴിഞ്ഞ തവണത്തേക്കാള്‍ സീറ്റു വര്‍ധിപ്പിക്കുക എന്ന ലക്ഷ്യത്തോടെയാണ് പ്രചരണം തുടരുന്നത് . സംസ്ഥാന ഭരണത്തിലെ അപാകതകള്‍ ചൂണ്ടിക്കാട്ടി ഇത്തവണ വിജയമുറപ്പിക്കാമെന്ന വിശ്വാസത്തിലാണ് UDF. നിയമസഭാ തെരഞ്ഞെടുപ്പിന്റെ സെമി ഫൈനലില്‍ വിജയിച്ച് ഫൈനലില്‍ ശക്തമായ മത്സരം കാഴ്ചവയ്ക്കുകയാണ് UDF ന്റെ ലക്ഷ്യം. പാര്‍ട്ടിയെ ഒറ്റക്കെട്ടായി നിര്‍ത്തി പ്രവര്‍ത്തനം ശക്തിപ്പെടുത്തുകയാണ്  UDF.സംസ്ഥാനത്ത് ഏറ്റവും കൂടുതല്‍ സ്ഥാനാര്‍ത്ഥികളെ നിര്‍ത്തി ഇത്തവണ ശക്തമായ മുന്നേറ്റത്തിനാണ് BJP ലക്ഷ്യമിടുന്നത്. കേന്ദ്രഭരണത്തിന്റെ ഗുണഫലങ്ങള്‍ സംസ്ഥാനത്തെത്തിക്കാന്‍ NDA യുടെ നേതൃത്വത്തിലുള്ള തദ്ദേശസ്ഥാപനങ്ങള്‍ വേണമെന്നു ചൂണ്ടിക്കാട്ടിയാണ് പ്രചരണം. മൂന്നു മുന്നണികളുടെയും പ്രചരണ കോലാഹലങ്ങള്‍ നിസ്സംഗതയോടെയാണ് സാധാരണ ജനങ്ങള്‍ വീക്ഷിക്കുന്നത്. വ്യക്തിപരമയും രാഷ്ട്രീയപരമായും സ്ഥാനാര്‍ത്ഥികളെ വിലയിരുത്തി വോട്ടു ചെയ്യുമെന്നാണ് വോട്ടര്‍മാര്‍ പറയുന്നത്.