ഭാര്യയുടെ പരാതിയെ തുടര്ന്ന് കേസന്വേഷിക്കാനെത്തിയ പോലീസുദ്യോഗസ്ഥനു നേരെ ഭര്ത്താവിന്റെ അക്രമം. പാമ്പാടി പോലീസ് സ്റ്റേഷനിലെ ജിബിന് ലോബോ എന്ന പോലീസുകാരനാണ് മുറിയില് പൂട്ടിയിട്ട സ്ത്രീയെ രക്ഷപെടുത്താന് ശ്രമിക്കുന്നതിനിടയില് മര്ദ്ദനമേറ്റത്. ജിബിന് കോട്ടയം മെഡിക്കല് കോളേജ് ആശുപത്രിയില് ചികിത്സയിലാണ്. പാമ്പാടി നെടുങ്കുഴി സ്വദേശി സാമാണ് പോലീസ് സംഘത്തെ ആക്രമിച്ചത്. ആക്രമണ ശേഷം പ്രതി ഓടി രക്ഷപ്പെട്ടു. ഇന്നലെ രാത്രി 10:20 ഓടുകൂടി പാമ്പാടി എട്ടാം മൈലിലാണ് സംഭവം നടന്നത്. കുടുംബ വഴക്കിനെ തുടര്ന്ന് സാമിന്റെ ഭാര്യയുടെ പരാതിയുടെ അടിസ്ഥാനത്തിലാണ് പോലീസ് സ്ഥലത്തെത്തിയത്. പോലീസ് എത്തുമ്പോള് സാം ഭാര്യയെ മുറിക്കുള്ളില് പൂട്ടിയിട്ടിരിക്കുകയായിരുന്നു. മുറി തുറക്കാന് ശ്രമിക്കുന്നതിനിടയാണ് സാം പോലീസുകാരനെ ആക്രമിച്ചത്. പരിക്കേറ്റ ജിബിനെ പാമ്പാടി താലൂക്ക് ആശുപത്രിയിലും തുടര്ന്ന് കോട്ടയം മെഡിക്കല് കോളേജ് ആശുപത്രിയിലും പ്രവേശിപ്പിച്ചു. മൂക്കിനു പൊട്ടലുണ്ട്. കണ്ണിനു മുകളിലായി നാല് തുന്നി കെട്ടല് ഉള്ളതായും പോലീസ്അറിയിച്ചു.
0 Comments