പാതയോരങ്ങള്‍ കാടുകയറുന്നത് ജനങ്ങളെ വലയ്ക്കുന്നു

പ്രധാന റോഡുകളിലും ഗ്രാമീണ റോഡുകളിലും പാതയോരങ്ങള്‍ കാടുകയറുന്നത് ജനങ്ങളെ വലയ്ക്കുന്നു.  റോഡില്‍കൂടി വാഹനങ്ങള്‍ കടന്നു വരുമ്പോള്‍ കാല്‍നട യാത്രികര്‍ റോഡ് വശങ്ങളിലെ കാടുകളില്‍ കയറി നില്‍ക്കേണ്ട അവസ്ഥയാണ്. കിടങ്ങൂര്‍ കൂത്താട്ടുകുളം കെ ആര്‍ നാരായണന്‍ റോഡില്‍ മിക്ക ഭാഗങ്ങളിലും ഇതാണ് അവസ്ഥ . കൂടാതെ പാലായിലും സമീപപ്രദേശങ്ങളിലും ഉള്ള മിക്ക റോഡുകളുടെയും വശങ്ങള്‍ കാടുപിടിച്ച നിലയിലാണ് . രണ്ടു വാഹനങ്ങള്‍ക്ക് ഒരേസമയം കടന്നു പോകാന്‍ പറ്റാതെ വരുമ്പോള്‍ കാല്‍ നടയാത്രക്കാര്‍ കാടിനുള്ളിലേക്ക് കയേറണ്ടിവരും.  വളവുകളില്‍ എതിരെ വരുന്ന വാഹനങ്ങളെ കാണാനാവാത്ത സാഹചര്യമാണ് ഉള്ളത്. കാല്‍ നടയാത്രക്കാരാണ് ഏറെ ബുദ്ധിമുട്ടിലാകുന്നത് . തദ്ദേശ സ്വയം ഭരണസ്ഥാപനങ്ങള്‍ മുന്‍കാലങ്ങളില്‍ കാട് വെട്ടി തെളിച്ചിരുന്നു. തൊഴിലുറപ്പ് തൊഴിലാളികളെയും ഇപ്പോള്‍ റോഡ് ശുചീകരണത്തിന്  അയയ്ക്കുന്നില്ല. കാട് മൂടിയ ഇടങ്ങളില്‍ മാലിന്യം തള്ളുന്നതും പതിവ് കാഴ്ചയാണ്. പാതയോരങ്ങളിലെ കാട് നീക്കാന്‍ അധികൃതര്‍ നടപടി സ്വീകരിക്കണമെന്ന്ആവശ്യമുയരുകയാണ്.