പൂത്തൃക്കോവില്‍ ക്ഷേത്രത്തില്‍ ഏകാദശി മഹോത്സവത്തിന് കൊടിയേറി

കുറിച്ചിത്താനം പൂത്തൃക്കോവില്‍ ക്ഷേത്രത്തില്‍ ഏകാദശി മഹോത്സവത്തിന് കൊടിയേറി. വൈകീട്ട് 7 ന് നടന്ന തിരുവുത്സവ കൊടിയേറ്റിന് തന്ത്രി മനയത്താറ്റില്ലത്ത് അനില്‍ ദിവാകരന്‍ നമ്പൂതിരി മുഖ്യ കാര്‍മ്മികത്വം വഹിച്ചു. നിരവധി ഭക്തര്‍ നാമ മന്ത്ര ജപങ്ങളുമായി കൊടിയേറ്റ് ചടങ്ങില്‍ പങ്കെടുത്തു. കൊടിയേറ്റിനു മുന്നോടിയായി കൊടിക്കുറ കൊടിക്കയര്‍ സമര്‍പ്പണ ഘോഷയാത്ര നടന്നു. 

കനിഷ് കരുണാകരന്‍ സമര്‍പ്പിക്കുന്ന കൊടിക്കുറയും കൊടിക്കയറും പെരുന്താനം തടിയില്‍ ഭവനത്തില്‍ നിന്നും വാദ്യമേളങ്ങളുടെയും താലപ്പൊലിയുടെയും അകമ്പടിയോടെയാണ് ക്ഷേത്രത്തിലെത്തിച്ചത് മേല്‍ശാന്തി പ്രദീപ് നമ്പൂതിരി കൊടിക്കുറയും കൊടിക്കയറും ഏറ്റുവാങ്ങി. രാവിലെ ഏകാദശി സംഗീതാത്സവത്തോടെയാണ് കലാവേദി ഉണര്‍ന്നത്. കൊടിയേറ്റിനു ശേഷം ഡബിള്‍ തായമ്പകയും നടന്നു. തിരുവുത്സവത്തോടനുബന്ധിച്ച് നവംബര്‍ 28, 29, 30 തീയതികളില്‍ ഉത്സവബലി ദര്‍ശനം നടക്കും. ഡിസംബര്‍ 1ന് ഏകാദശി വിളക്കും ഡിസംബര്‍ 2 ന് തിരുവാറാട്ടും നടക്കും.