ജില്ലാ പഞ്ചായത്ത് ഭരണങ്ങാനം ഡിവിഷനില്‍ 12 കോടി 27 ലക്ഷം രൂപയുടെ പദ്ധതികള്‍

ജില്ലാ പഞ്ചായത്ത് ഭരണങ്ങാനം ഡിവിഷനില്‍ 12 കോടി 27 ലക്ഷം രൂപയുടെ പദ്ധതികള്‍ പൂര്‍ത്തീകരിച്ചതായും  77 ലക്ഷം രൂപയുടെ നിര്‍മ്മാണ പ്രവര്‍ത്തികള്‍ നടന്നുവരുന്നതായും ജില്ലാ പഞ്ചായത്ത് മെമ്പര്‍ രാജേഷ് വാളിപ്ലാക്കല്‍ പറഞ്ഞു. ഭരണങ്ങാനം, കരൂര്‍, കടനാട്, മീനച്ചില്‍ എന്നീ നാല് പഞ്ചായത്തുകളിലായി 53 വാര്‍ഡുകളാണ് ഭരണങ്ങാനം ഡിവിഷനില്‍ ഉള്‍പ്പെടുന്നത്.. കുടിവെള്ളം, ശുചിത്വം, ആരോഗ്യമേഖല, തെരുവുവിളക്കുകള്‍, റോഡുകളുടെ നവീകരണം, അംഗന്‍വാടികളുടെ നിര്‍മ്മാണവും, പുനരുദ്ധാരണവും, ലൈഫ് ഭവന പദ്ധതി, പാലിയേറ്റീവ് കെയര്‍ എന്നീ മേഖലകളിലാണ് പ്രധാനമായും പദ്ധതികള്‍ നടപ്പിലാക്കിയത്. 

121 മിനി മാസ്റ്റ് ലൈറ്റുകള്‍ക്കായി ഒരു കോടി 51 ലക്ഷം രൂപയും പുതിയ കിണര്‍, മോട്ടോര്‍, ഓവര്‍ ഹെഡ് ടാങ്കുകള്‍, പൈപ്പ് ലൈനുകള്‍, ക്ലോറിനേറ്റര്‍, ഫില്‍ട്ടറിംഗ് യൂണിറ്റ് എന്നിവയ്ക്കായി ഒരു കോടി 47 ലക്ഷം രൂപയും നല്‍കി. വിവിധ സ്‌കൂളുകളില്‍ സാനിറ്റേഷന്‍ കോംപ്ലക്‌സുകള്‍, ഗേള്‍സ് ഫ്രണ്ട്‌ലി ടോയ്‌ലറ്റ്, റിംഗ് കമ്പോസ്റ്റ്, ബയോ കമ്പോസ്റ്റ്ര്‍ ബിന്‍, ജി-ബിന്‍, ജലഗുണ നിലവാര പരിശോധന ലാബ് എന്നിവയ്ക്കായി ഒരു കോടി 67 ലക്ഷം രൂപയാണ് ചെലവഴിച്ചത് റീടാറിങ്, കോണ്‍ക്രീറ്റിങ്, ക്രാഷ് ബാരിയറുകള്‍, കലുങ്കുകള്‍, ഓടകള്‍ എന്നിവ നിര്‍മ്മിക്കുന്നതിന് രണ്ടു കോടി 77 ലക്ഷം രൂപ, പുതിയ അംഗന്‍വാടി കെട്ടിടം, അംഗന്‍വാടി നവീകരണം, അംഗന്‍വാടികളുടെ അടിസ്ഥാന സൗകര്യ വികസനം എന്നിവയ്ക്കായി 57 ലക്ഷം രൂപയും അനുവദിച്ചു. മീനച്ചില്‍ പഞ്ചായത്തില്‍ ബഡ്‌സ് സ്‌കൂളിന് കെട്ടിടം വാങ്ങുന്നതിന് 30 ലക്ഷം രൂപ, പുതിയ ആശുപത്രി കെട്ടിടങ്ങളുടെ നിര്‍മ്മാണം, ഫിറ്റ്‌നസ് സെന്ററുകള്‍, ഓപ്പണ്‍ ജിം, ഇന്‍ഡോര്‍ ഷട്ടില്‍ കോര്‍ട്ട്, മിനി ഓപ്പണ്‍ സ്റ്റേഡിയം എന്നിവയ്ക്കായി രണ്ടു കോടി 20 ലക്ഷം രൂപ, മൂന്ന് ബസ് കാത്തിരിപ്പ് കേന്ദ്രങ്ങള്‍ക്ക് പത്തു ലക്ഷം രൂപ, കുടുംബശ്രീ സൂക്ഷ്മ സംരംഭങ്ങള്‍, വിവിധ ക്ഷീര സംഘങ്ങള്‍ക്ക് റിവോള്‍വിംഗ് ഫണ്ട്, ഓട്ടോമാറ്റിക് മില്‍ക്ക് കളക്ഷന്‍ യൂണിറ്റ്, എന്നിവയ്ക്കായി 32 ലക്ഷം രൂപ, വോള്‍ട്ടേജ് ക്ഷാമം പരിഹരിക്കുന്നതിനായി പുതിയ ട്രാന്‍സ്‌ഫോമറും, ലൈനുകളും സ്ഥാപിച്ചതിന് 32 ലക്ഷം രൂപ, സ്‌കൂളുകളില്‍ സോളാര്‍ പാനല്‍ സ്ഥാപിക്കുന്നതിന് 15 ലക്ഷം രൂപ, ലൈഫ് ഭവന പദ്ധതി, വിവിധ ആശുപത്രികളിലെ പാലിയേറ്റീവ് യൂണിറ്റ് എന്നിവയ്ക്കായി 65 ലക്ഷം രൂപ, കൃഷിയ്ക്കും അനുബന്ധ മേഖലകള്‍ക്കുമായി 27 ലക്ഷം രൂപ എന്നിവയാണ് പ്രധാനമായി അനുവദിച്ചിരിക്കുന്ന പദ്ധതികള്‍. നിര്‍മ്മാണം ആരംഭിച്ച നാല് റോഡുകളുടെയും, രണ്ട് സാനിറ്റേഷന്‍ കോംപ്ലക്‌സുകളുടെയും നിര്‍മ്മാണ പ്രവര്‍ത്തികള്‍ ഒരു മാസത്തിനുള്ളില്‍ പൂര്‍ത്തീകരിക്കും. 30 ലക്ഷം രൂപ ഉപയോഗിച്ച് നടപ്പാക്കുന്ന മീനച്ചില്‍ പഞ്ചായത്തിലെ വട്ടോത്തുകുന്നേല്‍ ഭാഗം കുടിവെള്ള പദ്ധതിയുടെ  കിണറിന്റെ പണിയും പൂര്‍ത്തികരിക്കും. ജനപ്രതിനിധികളുടെയും, ഉദ്യോഗസ്ഥരുടെയും, പൊതുജനങ്ങളുടെയും ആത്മാര്‍ത്ഥമായ സഹകരണം കൊണ്ടാണ് പദ്ധതികള്‍ സമയബന്ധിതമായി പൂര്‍ത്തീകരിക്കാന്‍ കഴിഞ്ഞതെന്നും ജില്ലാ പഞ്ചായത്ത് മെമ്പര്‍ രാജേഷ് വാളിപ്ലാക്കല്‍ പറഞ്ഞു.