സ്‌പെഷ്യല്‍ പബ്ലിക് പ്രോസിക്യൂട്ടറെ നിയമിച്ചതിന് സര്‍ക്കാരിനോട് നന്ദി പറഞ്ഞ് സിസ്റ്റര്‍ റാണിറ്റ്.

ഫ്രാങ്കോ മുളയ്ക്കല്‍ കേസുമായി ബന്ധപ്പെട്ട കേസ് നടത്തിപ്പിന് സ്‌പെഷ്യല്‍ പബ്ലിക് പ്രോസിക്യൂട്ടറെ നിയമിച്ചതിന് സര്‍ക്കാരിനോട് നന്ദി പറഞ്ഞ് സിസ്റ്റര്‍ റാണിറ്റ്. കേസിലെ അതിജീവിതയായ  സിസ്റ്റര്‍ റാണിറ്റിനും മറ്റ് സിസ്റ്റര്‍മാര്‍ക്കും  കേസ് തുടര്‍ന്ന് നടത്താന്‍ സ്‌പെഷ്യല്‍ പബ്ലിക് പ്രോസികൂട്ടറെ നിയമിക്കണമെന്ന് സിസ്റ്റര്‍ റാണിറ്റ് കഴിഞ്ഞ ദിവസം ആവശ്യപ്പെട്ടിരുന്നു. 

കുറവിലങ്ങാട് മഠത്തിലെ സിസ്റ്റര്‍മാരുടെ ആവശ്യം അംഗീകരിച്ച് സ്‌പെഷ്യല്‍ പ്രോസിക്യൂട്ടറെ നിയമിക്കാനും റേഷന്‍ കാര്‍ഡുകള്‍ നല്‍കാനും സര്‍ക്കാര്‍ കഴിഞ്ഞ ദിവസം തീരുമാനമെടുത്തിരുന്നു. തീരുമാനത്തില്‍ സര്‍ക്കാരിനോട് നന്ദി രേഖപ്പെടുത്തുകയായിരുന്നു സിസ്റ്റര്‍ റാണിറ്റ്. പ്രതിസന്ധി ഘട്ടത്തില്‍ കൂടെ നിന്ന സര്‍ക്കാരിനും പൊതുസമൂഹത്തിനും പ്രത്യേകം നന്ദിയുണ്ടെന്ന്  സിസ്റ്റര്‍മാര്‍ പറഞ്ഞു. സിസ്റ്റര്‍മാര്‍ ആവശ്യപ്പെട്ടതനുസരിച്ച് ഹരീന്ദ്രനാഥിനെയാണ് സ്‌പെഷ്യല്‍ പബ്ലിക് പ്രോസിക്യൂട്ടറായി സര്‍ക്കാര്‍ അനുവദിച്ച് നല്‍കിയത്. കഴിഞ്ഞദിവസം റേഷന്‍ കാര്‍ഡും സര്‍ക്കാര്‍ അനുവദിച്ച് കൈമാറിയിരുന്നു. കേസ് നടത്തിപ്പുമായി അനാവശ്യ വിവാദങ്ങള്‍ക്ക് ഇല്ലെന്നും സിസ്റ്റര്‍ റാണിറ്റ് കുറവിലങ്ങാട്ട് മാധ്യമ പ്രവര്‍ത്തകരോട് പറഞ്ഞു.