പൂഞ്ഞാറില് ഫാ ജോസഫ് ആറ്റുചാലിലിനെ പള്ളി കോമ്പൗണ്ടില് അതിക്രമിച്ചു കയറി അപായപ്പെടുത്താന് ശ്രമിച്ച സംഭവം അപലപനീയമാണെന്ന് മാണി സി കാപ്പന് എം.എല്.എ പറഞ്ഞു. മാര് സ്ലീവാ മെഡിസിറ്റിയില് ചികിത്സയില് കഴിയുന്ന ഫാ ജോസഫിനെ സന്ദര്ശിച്ചശേഷം സംസാരിക്കുകയായിരുന്നു അദ്ദേഹം. എല്ലാ മതവിഭാഗങ്ങള്ക്കും പ്രവര്ത്തിക്കാനുള്ള സ്വാതന്ത്ര്യം ഭരണഘടന അനുവദിച്ചു നല്കുന്നുണ്ട്. മറ്റു മതങ്ങളെ ആദരവോടെ സമീപിക്കാന് പൊതുസമൂഹത്തില് ഉള്ള ഓരോ വ്യക്തിക്കും കടമയുണ്ട്. തങ്ങളുടെ ആരാധനയ്ക്ക് തടസ്സമാകുന്ന രീതിയില് തങ്ങളുടെ കോമ്പൗണ്ടില് ശബ്ദകോലാഹലങ്ങള് ഒഴിവാക്കണമെന്ന് പറഞ്ഞ വൈദികനെ വാഹനമിടിച്ച് അപായപ്പെടുത്താന് ശ്രമിച്ച നടപടി അംഗീകരിക്കാനാവില്ല. ഇക്കാര്യത്തില് വൈകാരികമായി ഇടപെടാതെ സമചിത്തതയോടും പക്വതയോടും ഇടപെട്ട പാലാ രൂപതാദ്ധ്യക്ഷന് മാര് ജോസഫ് കല്ലറങ്ങാട്ടിന്റെയും പാലാ രൂപതയുടെയും നിലപാട് മാതൃകപരമാണ്. മതസൗഹാര്ദ്ദം ഊട്ടി ഉറപ്പിക്കാനുള്ള നടപടികളാണ് പാലാ രൂപത ചെയ്തിരിക്കുന്നത്. സംഭവത്തെത്തുടര്ന്നു ക്രൈസ്തവരില് ഉയര്ന്നിട്ടു ആശങ്കകള് പരിഹരിക്കാന് സര്ക്കാര് മുന്നിട്ടിറങ്ങണം. മേലില് ഇത്തരം സംഭവങ്ങള് ആവര്ത്തിക്കാതിരിക്കാനുള്ള നടപടികളും സ്വീകരിക്കണം. ഇതിനായി ഈ സംഭവത്തില് കര്ശന നിയമ നടപടികള് സ്വീകരിക്കാന് സര്ക്കാര് തയ്യാറാകണം. കേന്ദ്ര ഏജന്സി ഇതേക്കുറിച്ച് അന്വേഷിക്കണമെന്നും വൈദികനെ ആക്രമിച്ച സംഭവത്തിലെ കുറ്റക്കാരെ തള്ളിപ്പറയാന് പൊതുസമൂഹം തയ്യാറാകണമെന്നും മാണി സി കാപ്പന് ആവശ്യപ്പെട്ടു. ജാതിയുടെയും മതത്തിന്റെ പേരില് ജനങ്ങള് തമ്മില് വേര്തിരിവ് ഉണ്ടാവാന് പാടില്ലെന്നും കാപ്പന് പറഞ്ഞു.
0 Comments