കടുത്തുരുത്തിയിലെ പള്ളിമേടയില്‍ വികാരിയച്ചന്റെ മുറിയോടു ചേര്‍ന്ന് അടയ്ക്കാ പക്ഷിയുടെ കൂടും പക്ഷികുഞ്ഞുങ്ങളും കൗതുകക്കാഴ്ചയായി. സെന്റ് മേരീസ് ഫൊറോനാ താഴത്തുപള്ളി വികാരി ഫാദര്‍ മാത്യു ചന്ദ്രന്‍കുന്നേലിന്റെ മുറിയുടെ മുന്‍വശത്ത് ടേബിളില്‍ വച്ചിരിക്കുന്ന ചെടിച്ചട്ടിയിലെ കുറ്റിച്ചെടിയിലാണ് അടയ്ക്കാ പക്ഷി കൂട് കൂട്ടി, മുട്ടയിട്ട് വിരിഞ്ഞ് കുഞ്ഞുങ്ങളുമായി സുരക്ഷിതമായി കഴിയുന്നത്.
സാധാരണയായി മനുഷ്യരുടെ സമീപത്ത് ഇത്തരം പക്ഷികള്‍ കൂട് കൂട്ടുകയോ, മുട്ടയിടുകയോ ചെയ്യാറില്ല. ചെടിയില്‍ പക്ഷികള്‍ കൂട് കൂട്ടുന്നത് ഫാ മാത്യു ചന്ദ്രന്‍കുന്നേലിന്റെ ശ്രദ്ധയില്‍പെട്ടപ്പോള്‍ പക്ഷികളെ ആരും ശല്യം ചെയ്യാതിരിക്കാന്‍ അദ്ദേഹം പ്രത്യേകം ശ്രദ്ധിച്ചിരുന്നു. മുട്ട വിരിഞ്ഞ് മുന്ന് പക്ഷികുഞ്ഞുങ്ങളുമായി കഴിയുന്ന തള്ളപക്ഷി ഇടയ്ക്ക് പുറത്ത് പോയി കുഞ്ഞുങ്ങള്‍ക്ക് തീറ്റ കൊണ്ടുവരും. ആണ്‍പക്ഷിയും തീറ്റയുമായി വരാറുണ്ട്. രണ്ടാം നിലയിലാണ് പക്ഷികളുടെ വാസം. പുറത്തേക്കുള്ള ഭിത്തിക്ക് പകരമുള്ള ഗ്രില്ലിലൂടെയാണ് പക്ഷികള്‍ വന്നു പോകുന്നത്. പള്ളിമേടയില്‍ വാസമുറപ്പിച്ചിരിക്കുന്ന അടയ്ക്കാപക്ഷിയുടെ കൂട് കാഴ്ച്ചക്കാരിലും കൗതുകമുണര്‍ത്തുകയാണ്.
0 Comments