അന്താരാഷ്ട്രാ പ്രസംഗ മത്സരം സീസണ്‍ 3 ഗ്രാന്‍ഡ് ഫിനാലേ ശനിയാഴ്ച നടക്കും.

ഓവര്‍സീസ് റസിഡന്റ് മലയാളീസ് അസോസിയേഷന്‍ ടാലന്റ് പ്രൊമോഷന്‍ ഫോറം സംഘടിപ്പിക്കുന്ന അന്താരാഷ്ട്രാ പ്രസംഗ മത്സരം സീസണ്‍ 3 ഗ്രാന്‍ഡ് ഫിനാലേ ശനിയാഴ്ച പാലായിലെ  സെന്റ് തോമസ് കോളേജ് ഇന്റഗ്രേറ്റഡ് സ്‌പോര്‍ട്‌സ് കോംപ്ലക്‌സില്‍ നടക്കുമെന്ന്  ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 

ഫിനാലെയുടെ ഉദ്ഘാടനം വെള്ളിയാഴ്ച പാലാ Dysp സദന്‍ നിര്‍വഹിച്ചു. സമാപന സമ്മേളനം ശനിയാഴ്ച ഉച്ചകഴിഞ്ഞ് 2 ന് മന്ത്രി പി പ്രസാദ് ഉദ്ഘാടനം ചെയ്ത് സമ്മാനദാനം നിര്‍വ്വഹിക്കും. സംസ്ഥാന ഇന്റലിജിന്‍സ് മേധാവി എഡിജിപി പി വിജയന്‍  മുഖ്യപ്രഭാഷണം നടത്തും. ജോസ് കെ മാണി എം.പി, മാണി സി കാപ്പന്‍ എംഎല്‍എ, പാലാ മുന്‍സിപ്പല്‍ ചെയര്‍മാന്‍ തോമസ് പീറ്റര്‍, സിനിമ സംവിധായകന്‍ ഭദ്രന്‍ മാട്ടേല്‍, 24 ന്യൂസിലെ ന്യൂസ് അവതാരകന്‍ ഹാഷ്മി താജ് ഇബ്രാഹിം എന്നിവര്‍ പ്രസംഗിക്കും. ചലച്ചിത്രതാരം വിന്‍സി അലോഷ്യസ്  വിജയികളെ പ്രഖ്യാപിക്കും. മത്സരാര്‍ത്ഥികള്‍ക്കും കുടുംബങ്ങള്‍ക്കുമായി ടോപ് സിങ്ങര്‍ താരങ്ങള്‍ ആയ ഹരി പിവി, വൈഷ്ണവി പണിക്കര്‍ എന്നിവര്‍ പ്രത്യേക സംഗീത പരിപാടി അവതരിപ്പിക്കും. സീസണ്‍ 3ല്‍ സീനിയര്‍ ജൂനിയര്‍ വിഭാഗങ്ങളിലായി പത്ത് ലക്ഷം രൂപയുടെ സമ്മാനങ്ങളാണ് ഒരുക്കിയിരിക്കുന്നത്. ഫൈനല്‍ റൗണ്ടില്‍ വിജയികളാകുന്ന വിദ്യാര്‍ത്ഥികള്‍ക്ക് ക്യാഷ് അവാര്‍ഡും ട്രോഫിയും സര്‍ട്ടിഫിക്കറ്റും ലഭിക്കും. ഗ്രാന്‍ഡ് പ്രൈസായ ഓര്‍മ്മ ഒറേറ്റര്‍ ഓഫ് ദി ഇയര്‍-2025' പ്രതിഭയ്ക്ക് ഒരു ലക്ഷം രൂപ ക്യാഷ്  പ്രൈസും അവാര്‍ഡും പ്രശസ്തിപത്രവുമാണ് സമ്മാനമായി നല്‍കുന്നത്. സീനിയര്‍ വിഭാഗത്തില്‍ മലയാളം-ഇംഗ്ലീഷ് ഭാഷകളിലോരോന്നിലും ഒന്നാം സ്ഥാനം നേടുന്നയാള്‍ക്ക് 50,000 രൂപ വീതം ലഭിക്കും. 30,000 രൂപ വീതമുള്ള രണ്ട് രണ്ടാം സമ്മാനങ്ങളും 20,000 രൂപ വീതമുള്ള മൂന്ന് മൂന്നാം സമ്മാനങ്ങളും 10,000 രൂപ വീതം നാല് നാലാം സമ്മാനങ്ങളും 5000 രൂപ വീതം അഞ്ച് അഞ്ചാം സമ്മാനങ്ങളും  നല്‍കും. വാര്‍ത്താ സമ്മേളനത്തില്‍ ഓര്‍മ്മ ഇന്റര്‍നാഷണല്‍ പ്രസിഡന്റ് സജി സെബാസ്റ്റ്യന്‍, ടാലെന്റ് പ്രമോഷന്‍ ഫോറം ചെയര്‍മാന്‍ ജോസ് തോമസ്, സെക്രട്ടറി എബി ജെ ജോസ്, ഓര്‍മ്മ കേരള ചാപ്റ്റര്‍ പ്രസിഡന്റ് കുര്യാക്കോസ് മാണിവയലില്‍, സിജു സെബാസ്റ്റന്‍ തുടങ്ങിയവര്‍ പങ്കെടുത്തു.