സ്‌പോര്‍ട്‌സ് മെഡിസിന്‍ ചികിത്സയില്‍ അല്ലോഗ്രാഫ്റ്റ് ട്രാന്‍സ്പ്ലാന്റേഷന്‍ ശസ്ത്രക്രിയയിലൂടെ മാര്‍ സ്ലീവാ മെഡിസിറ്റി നേട്ടം കൈവരിച്ചു. വിദേശത്ത് വെച്ച് ക്രിക്കറ്റ് കളിക്കിടെ വീണു കാല്‍മുട്ടിന് പരുക്കേറ്റ 40 വയസ്സുള്ള കോട്ടയം സ്വദേശിയായ യുവാവിനാണ് അവയവമാറ്റത്തിലൂടെ അല്ലോഗ്രാഫ്റ്റ് ട്രാന്‍സ്പ്ലാന്റേഷനിലൂടെ ആന്റീരിയര്‍ ക്രൂഷ്യേറ്റ് ലിഗ്‌മെന്റ് പുനസ്ഥാപിക്കുന്ന ശസ്ത്രക്രിയ വിജയകരമായി പൂര്‍ത്തിയാക്കിയത്. ബെംഗളൂരുവില്‍ നിന്നാണ് അല്ലോഗ്രാഫ്റ്റ് ആശുപത്രിയില്‍ എത്തിച്ചത്.
ഓര്‍ത്തോപീഡിക്‌സ് വിഭാഗം സീനിയര്‍ കണ്‍സള്‍ട്ടന്റ് ഡോ.രാജീവ് പി.ബിയുടെ നേതൃത്വത്തിലായിരുന്നു ശസ്ത്രക്രിയ. മരണാനന്തരം ദാനം ചെയ്യുന്നവരുടെ അല്ലോഗ്രാഫ്റ്റ് ഇതര സംസ്ഥാനങ്ങളിലെ ലൈസന്‍സ് ഉള്ള ടിഷ്യു ബാങ്കുകളിലാണ് ഉയര്‍ന്ന നിലവാരത്തില്‍ സംരക്ഷിച്ചു സൂക്ഷിക്കുന്നത്. അല്ലോഗ്രാഫ്റ്റ് പുനസ്ഥാപിക്കുന്നതിലൂടെ പുനരധിവാസവും സാധാരണ നിലയിലേക്കുള്ള മടങ്ങി വരവും എളുപ്പത്തിലാകും. റോഡ് അപകടങ്ങളിലും കായിക രംഗത്തെ അപകടങ്ങളിലും പരുക്കേല്‍ക്കുന്നവര്‍ക്ക് സ്വന്തം ഓട്ടോഗ്രാഫ്റ്റ് ലഭ്യമല്ലാതെ വരുമ്പോള്‍ അല്ലോഗ്രാഫ്റ്റ് ഉപയോഗിക്കുന്നത് ഏറെ സുരക്ഷിതവും ഫലപ്രദവുമാണ്. സ്വന്തം കാലില്‍ നിന്നു പേശികള്‍ ശസ്ത്രക്രിയയ്ക്കായി എടുക്കുമ്പോള്‍ ഉണ്ടാകുന്ന പേശീബലക്കുറവ് ഒഴിവാക്കുന്നതിനും, അല്ലോഗ്രാഫ്റ്റ് സഹായകമാണ്. കായികതാരങ്ങള്‍ക്ക് പരുക്ക് ഭേദമായി പരിശീലനം തുടരാനും സാധിക്കും. ഒന്നില്‍ കൂടുതല്‍ ലിഗ്‌മെന്റുകള്‍ക്ക് പരുക്ക് പറ്റുന്നവര്‍ക്ക് ശരീരത്ത് നിന്ന് കൂടുതല്‍ പേശികള്‍ എടുക്കേണ്ടി വരുന്നത് ഒഴിവാക്കാന്‍ സാധിക്കുമെന്നതും അല്ലോഗ്രാഫ്റ്റ് പുനസ്ഥാപന ചികിത്സയുടെ നേട്ടമാണ്. കഴിഞ്ഞ ജനുവരിയില്‍ സംസ്ഥാനത്തെ ആദ്യ അല്ലോഗ്രാഫ്റ്റ് കാര്‍ട്ടിലേജ് ട്രാന്‍സ്പ്ലാന്റേഷനും ഡോ.രാജീവ് പി.ബി യുടെ നേതൃത്വത്തില്‍ സ്‌പോര്‍ട്‌സ് ചികിത്സയ്ക്കു പ്രത്യേക സൗകര്യമുള്ള മാര്‍ സ്ലീവാ മെഡിസിറ്റിയില്‍ വിജകരമായി നടത്തിയിരുന്നു. ഓര്‍ത്തോപീഡിക്‌സ് വിഭാഗത്തിലെ ഡോ.അഭിരാം കൃഷ്ണന്‍ അനസ്‌തേഷ്യോളജി വിഭാഗത്തിലെ ഡോ.ജെയിംസ് സിറിയക്, ഡോ.അജിത് പി.തോമസ് എന്നിവരും ശസ്ത്രക്രിയയുടെ ഭാഗമായി.
0 Comments