കമ്പ്യൂട്ടറൈസേഷന്‍ പദ്ധതിയ്ക്കായി 22 ലക്ഷം രൂപയുടെ ഉപകരണങ്ങള്‍ നല്‍കി.

പാലാ നിയോജക മണ്ഡലത്തിലെ റവന്യൂ ഓഫീസുകളുടെ കമ്പ്യൂട്ടറൈസേഷന്‍ പദ്ധതിയ്ക്കായി 22 ലക്ഷം രൂപയുടെ ഉപകരണങ്ങള്‍ നല്‍കി. എം.എല്‍.എ മാരുടെ പ്രത്യേക വികസന നിധിയില്‍  നിന്നും മാണി സി കാപ്പന്‍ എംഎല്‍എ അനുവദിച്ച ഫണ്ടു പയോഗിച്ചാണ് വിവിധ ഉപകരണങ്ങള്‍ നല്‍കിയത്. പാലാ മണ്ഡലത്തില്‍ ഉള്‍പ്പെടുന്ന താലൂക്ക് ഓഫീസ്, വില്ലേജ് ഓഫീസുകള്‍ എന്നിവിടങ്ങളിലെ ഇ-ഓഫീസ് സംവിധാനം മെച്ചപ്പെടുത്തുന്നതിലേക്കായാണ് ഇരുപത്തി രണ്ട് ലക്ഷം രൂപയുടെ ഉപകരണങ്ങള്‍ നല്‍കിയത്. 

17 A3  ഫോട്ടോ കോപ്പിയര്‍   13 A4 ഷീറ്റ് ഫെഡ് സ്‌കാനര്‍, 18 ലാപ് ടോപ്പുകള്‍ എന്നിയാണ് അനുവദിച്ചത്. ളാലം, തലനാട്, മൂന്നിലവ്, മേലുകാവ്, തലപ്പലം, ഭരണങ്ങാനം, പൂവരണി, കടനാട്, രാമപുരം, വെള്ളിലാപ്പിള്ളി, വള്ളിച്ചിറ,  മീനച്ചില്‍, പുലിയന്നൂര്‍ എന്നീ വില്ലേജ് ഓഫീസുകളിലേക്ക് ഓരോ എ3 പ്രിന്റര്‍, എ4 ഷീറ്റ് ഫെഡ് സ്‌കാനര്‍, ലാപ് ടോപ്  എന്നിവയും മീനച്ചില്‍ താലൂക്ക് ഓഫീസിലേക്ക് രണ്ട് എ3 പ്രിന്റര്‍, ഒരു എ3 ഷീറ്റ് ഫെഡ് സ്‌കാനര്‍, മൂന്നു ലാപ് ടോപ്  എന്നിവയും കാഞ്ഞിരപ്പള്ളി താലൂക്കില്‍ ഉള്‍പ്പെട്ട എലിക്കുളം വില്ലേജ് ഓഫീസിനായി ഒരു എ3 പ്രിന്റര്‍, രണ്ട് ലാപ് ടോപ് എന്നിവയും, ഇളങ്ങുളം വില്ലേജ് ഓഫീസിലേക്ക് ഒരു എ3 പ്രിന്റര്‍   എന്നിവയുമാണ് നല്‍കുന്നത്.  ഉപകരണങ്ങളുടെ വിതരണ ഉദ്ഘാടനം മാണി സി കാപ്പന്‍ MLA നിര്‍വഹിച്ചു. മീനച്ചില്‍ താലൂക്ക് ഓഫീസ് കോണ്‍ഫറന്‍സ് ഹാളില്‍ നടന്ന യോഗത്തില്‍ തഹസില്‍ദാര്‍ ലിറ്റിമോള്‍ തോമസ് അധ്യക്ഷയായിരുന്നു. RDO ദീപ കെ.പി, കാഞ്ഞിരപ്പളളി തഹസില്‍ദാര്‍ ബിജിമോന്‍ എ.എസ്. LR തഹസീല്‍ദാര്‍ സീമ ജോസഫ് , ബിന്ദു തോമസ് തുടങ്ങിയവര്‍ പ്രസംഗിച്ചു.