മത്സരാര്‍ത്ഥിയുടെ നഷ്ടപ്പെട്ട ബാഗ് കണ്ടെത്തി തിരികെ നല്‍കി ഓട്ടോറിക്ഷാ ഡ്രൈവര്‍മാര്‍

മരങ്ങാട്ടുപിള്ളി ലേബര്‍ ഇന്ത്യ സ്‌കൂളില്‍  നടക്കുന്ന CBSE കലോത്സവത്തില്‍ പങ്കെടുക്കുന്നതിനായെത്തിയ മത്സരാര്‍ത്ഥിയുടെ നഷ്ടപ്പെട്ട ബാഗ് കണ്ടെത്തി തിരികെ നല്‍കി മരങ്ങാട്ടുപിള്ളിയിലെ ഓട്ടോറിക്ഷാ ഡ്രൈവര്‍മാര്‍ മാതൃകയായി. മലപ്പുറത്തു നിന്നെത്തിയ മത്സരാര്‍ത്ഥിയും കുടുംബവും  കോട്ടയം റെയില്‍വേ സ്റ്റേഷനിലേക്ക് പോകുന്നതിനായി ഓട്ടോയില്‍ കയറി  ഏറ്റുമാനൂര്‍ അമ്പലം ഭാഗത്ത് ഇറങ്ങുകയായിരുന്നു. ഓട്ടോ തിരികെ പോയ ശേഷം ആണ് പലവിധ ID കാര്‍ഡുകളും മറ്റും അടങ്ങിയ ബാഗ് നഷ്ടപ്പെട്ട വിവരം അറിയുന്നത്. ഉടന്‍ തന്നെ ഏറ്റുമാനൂര്‍ പോലീസ് സ്റ്റേഷനില്‍ വിവരം അറിയിക്കുകയും, ഏറ്റുമാനൂര്‍ പോലീസ് സ്റ്റേഷനില്‍ നിന്നും ASI ചന്ദ്രഭാനു S.R എന്ന പോലീസ് ഉദ്യോഗസ്ഥന്‍ കലോത്സവം നടക്കുന്ന മരങ്ങാട്ടുപിള്ളി പോലീസ് സ്റ്റേഷനില്‍ വിവരം അറിയിക്കുകയും ചെയ്തു. മരങ്ങാട്ടുപിള്ളി പോലീസ്  പോലീസ് സ്റ്റേഷന്‍ പരിധിയിലെ ഓട്ടോ ഡ്രൈവര്‍മാരുടെ വാട്‌സാപ്പ് ഗ്രൂപ്പില്‍ ഈ വിവരം  അറിയിച്ചു. 

സ്‌കൂളിന് സമീപമുള്ള 6 ഓളം ഓട്ടോ സ്റ്റാന്‍ഡിലെ ഡ്രൈവേഴ്‌സിനെ ഫോണിലും ബന്ധപ്പെട്ട് അന്വേഷണം വേഗത്തിലാക്കി.  മരങ്ങാട്ടുപിള്ളി സ്റ്റാന്‍ഡിലെ ശ്യാം രാജ്, ജോബി, ഇലക്കാട് സ്റ്റാന്‍ഡിലെ അജീഷ്, മടയക്കുന്നു സ്റ്റാന്‍ഡിലെ പവിഴം അനിയന്‍,  വളകുഴി സ്റ്റാന്‍ഡിലെ ബിജുമോന്‍ എന്നിവര്‍ നടത്തിയ അന്വേഷണത്തിലാണ് ഓട്ടോയുടെ ബാക്കില്‍ കിടന്നിരുന്ന ബാഗ് കണ്ടെത്തിയത്. ഉടന്‍ തന്നെ മരങ്ങാട്ടുപിള്ളി പോലീസ് ബാഗിന്റെ ഉടമസ്ഥനെ ഫോണില്‍ വിളിക്കുകയും മരങ്ങാട്ടുപിള്ളി ഓട്ടോ സ്റ്റാന്‍ഡിലെ ശ്യാം രാജ് ബാഗ്  ശ്യാം കോട്ടയത്ത് എത്തി ഉടമസ്ഥനായ മലപ്പുറം നിലമ്പൂര്‍ സ്വദേശിയായ അഹമ്മദിന് ബാഗ് കൈമാറുകയുമായിരുന്നു. നഷ്ടപ്പെട്ട ബാഗ് കണ്ടെത്തി തിരികെ നല്‍കിയ ഓട്ടോ  ഡ്രൈവേഴ്‌സിനെ അധികൃതര്‍ അഭിനന്ദിച്ചു.