പുലിയന്നൂര്‍ മഹാദേവ ക്ഷേത്രത്തില്‍ പ്രൗഡ ഗംഭീരമായ കാവടി ഘോഷയാത്ര നടന്നു.

ശിവരാത്രി ആഘോഷങ്ങളോടനുബന്ധിച്ച് പുലിയന്നൂര്‍ മഹാദേവ ക്ഷേത്രത്തില്‍ പ്രൗഡ ഗംഭീരമായ കാവടി ഘോഷയാത്ര നടന്നു. ശിവരാത്രി നാളില്‍ ക്ഷേത്രത്തിലെ തിരുവുത്സവത്തിന്റെ പള്ളിവേട്ട  ദിനത്തില്‍ ഭക്തിനിര്‍ഭരമായ ചടങ്ങുകളാണ് നടന്നത്. രാവിലെ നടന്ന ശ്രീബലി എഴുന്നള്ളിപ്പിന് ഗജരാജന്‍ അക്കിക്കാവ് കാര്‍ത്തികേയന്‍ തൃപ്പുലിയന്നൂരപ്പന്റെ തിടമ്പേറ്റി . ഒറ്റപ്പാലം ഹരിയുടെ പ്രമാണത്തില്‍ പഞ്ചവാദ്യവും നടന്നു. 

ശിവരാത്രിയോടനുബന്ധിച്ച് കാവടി ഘോഷയാത്ര കടപ്പാട്ടൂര്‍ ശ്രീമഹാദേവ ക്ഷേത്രത്തില്‍ നിന്നും ആരംഭിച്ചു. കൊട്ടക്കാവടിയും ആട്ടക്കാവടിയും, പൂക്കാവടിയും വര്‍ണ്ണക്കാഴ്ചയൊരുക്കി. ശിങ്കാരിമേളവും പാണ്ടിമേളവും ഘോഷയാത്രയ്ക്ക് നാദവിസ്മയമൊരുക്കി.. ദേവകലാ നൃത്തം, കഥകളിയാട്ടം, പൂതന്‍ കളി, അലങ്കാര രഥം തുടങ്ങിയ ദൃശ്യവിസ്മയങ്ങളുമായി ഘോഷയാത്ര നീങ്ങിയപ്പോള്‍ ഭക്തസഹസ്രങ്ങള്‍ പുലിയന്നൂര്‍ കാവടി ഘോഷയാത്രയില്‍ പങ്കു ചേര്‍ന്നു. ഒരു മണിയോടെ കാവടി ഘോഷയാത്ര ക്ഷേത്രാങ്കണത്തിലെത്തി. തുടര്‍ന്ന് കാവടി അഭിഷേകം നടന്നു. മഹാപ്രസാദമൂട്ടും നടന്നു. കുറത്തിയാട്ടവും ഓട്ടന്‍ തുള്ളലും തിരുവരങ്ങില്‍ നടന്നു. വൈകീട്ട് കാഴ്ചശ്രീബലി, വേലകളി, നൃത്തനാടകം , ശിവരാത്രി പൂജ, പള്ളിവേട്ട എഴുന്നള്ളിപ്പ് തുടങ്ങിയ പരിപാടികളാണ് ഏഴാം ഉത്സവദിനത്തില്‍ നടക്കുന്നത്. തിങ്കളാഴ്ച ആറാട്ടോടെ ഉത്സവാഘോഷങ്ങള്‍ സമാപിക്കും.