പാലാ ഈരാറ്റുപേട്ട റോഡില്‍ പനക്കപ്പാലത്തിന് സമീപം ജീപ്പും ട്രാവലറും കൂട്ടിയിടിച്ച് ഉണ്ടായ അപകടത്തില്‍ ഒരാള്‍ക്ക് പരിക്കേറ്റു. കളത്തൂക്കടവ് സ്വദേശി കുര്യാച്ചനാണ് പരിക്കേറ്റത്. പരിക്കേറ്റ കുര്യാച്ചനെ ഈരാറ്റുപേട്ട സണ്‍റൈസ് ഹോസ്പിറ്റലില്‍ പ്രവേശിപ്പിച്ചു.
ഇന്ന് ഉച്ചകഴിഞ്ഞ് 3.45 ഓടെ പനക്കപ്പാലത്തിനു സമീപമാണ് നിയന്ത്രണം വിട്ട ജീപ്പ് ട്രാവലറിലേക്ക് ഇടിച്ചു കയറിയത് . വിനോദസഞ്ചാരത്തിനായി പോയ കോട്ടയം സ്വദേശികള്‍ സഞ്ചരിച്ച ട്രാവലര്‍ ഈരാറ്റുപേട്ടയില്‍ നിന്നും പാലായിലേക്ക് വരികയായിരുന്നു. വളവ് തിരിഞ്ഞ് എത്തിയ ട്രാവലറിലേക്ക് പാലാ ഭാഗത്തുനിന്ന് എത്തിയ ജീപ്പ് ഇടിക്കുകയായിരുന്നു. ഈരാറ്റുപേട്ട പോലീസും ഫയര്‍ഫോഴ്‌സും സ്ഥലത്തെത്തി മേല്‍ നടപടികള്‍ സ്വീകരിച്ചു. കുര്യാച്ചന്റെ പരിക്ക്ഗുരുതരമല്ല.
0 Comments