പാലാ സെന്റ് തോമസ് കോളേജില്‍ ആത്മഹത്യാ പ്രതിരോധ ദിനാചരണം നടന്നു.

പാലാ സെന്റ് തോമസ് കോളേജില്‍ ആത്മഹത്യാ പ്രതിരോധ ദിനാചരണം നടന്നു. ലോക ആത്മഹത്യാ പ്രതിരോധ ദിനമായ സെപ്റ്റംബര്‍ പത്തിന്  സെന്റ് തോമസ് കോളേജിലെ സൈക്കോളജി വിഭാഗത്തിന്റെ നേതൃത്വത്തിലാണ്  'പ്രത്യാശ' എന്ന പേരില്‍ പ്രത്യേക പരിപാടി സംഘടിപ്പിച്ചത്. കൊട്ടാരമറ്റം ബസ് സ്റ്റാന്‍ഡില്‍ നടന്ന പ്രത്യാശ പരിപാടിയുടെ  ഉദ്ഘാടനം പാലാ മുനിസിപ്പല്‍ ചെയര്‍മാന്‍  തോമസ് പീറ്റര്‍ നിര്‍വ്വഹിച്ചു. 

കോളേജ് പ്രിന്‍സിപ്പാള്‍ ഡോ. സിബി ജെയിംസ്, വൈസ് പ്രിന്‍സിപ്പാള്‍ റവ. ഡോ. സാല്‍വിന്‍ കെ. തോമസ്, സെല്‍ഫ് ഫിനാന്‍സിംഗ് ഡിപ്പാര്‍ട്ട്‌മെന്റ്‌സ് കോര്‍ഡിനേറ്റര്‍ റവ.ഫാ. റോഷന്‍ എണ്ണയ്ക്കാപ്പള്ളില്‍, സൈക്കോളജി വിഭാഗം മേധാവി മെറിന്‍ ലിറ്റി ജോണ്‍, അദ്ധ്യാപിക പ്രിന്‍ഷ രാജന്‍ എന്നിവര്‍ ചടങ്ങില്‍ സന്നിഹിതരായിരുന്നു.വിദ്യാര്‍ത്ഥികള്‍ അവതരിപ്പിച്ച 'പ്രത്യാശ' എന്ന സംഗീത നാടകാവിഷ്‌കാരമാണ് ദിനാചരണത്തിന്റെ പ്രധാന ആകര്‍ഷണം. ജീവിതത്തിലെ വെല്ലുവിളികളും ഇരുട്ടുകളും അതിജീവിക്കാന്‍ സ്നേഹവും കരുതലും പ്രത്യാശയും എങ്ങനെ വഴികാട്ടിയാകുന്നു എന്ന സന്ദേശം അവതരണം പ്രേക്ഷകരിലേക്ക് ശക്തമായി എത്തിച്ചു. അധ്യാപകരും വിദ്യാര്‍ത്ഥികളും പങ്കെടുത്ത ചടങ്ങ്, ജീവിതത്തിന്റെ മഹത്ത്വവും കരുതലിന്റെയും പ്രത്യാശയുടെയും പ്രാധാന്യവും സമൂഹത്തില്‍ ഉണര്‍ത്തി.