പൂവരണി മഹാദേവക്ഷേത്രത്തിലെ തിരുവുത്സവം 2026 ജനുവരി 23 മുതല്‍ 30 വരെ

ത്രിശ്ശിവപേരൂര്‍ തെക്കേമഠം വക പൂവരണി മഹാദേവക്ഷേത്രത്തിലെ  തിരുവുത്സവം 2026 ജനുവരി 23 മുതല്‍ 30 വരെ നടക്കും. ജനുവരി 23 വെള്ളിയാഴ്ച ക്ഷേത്രം തന്ത്രി ഭദ്രകാളി മറ്റപ്പള്ളി നാരായണന്‍ നമ്പൂതിരിപ്പാടിന്റെ മുഖ്യകാര്‍മ്മികത്വത്തിലും, മേല്‍ശാന്തി  കല്ലംപള്ളി ഇല്ലത്ത് വിഷ്ണു നമ്പൂതിരിയുടെ സഹകാര്‍മ്മികത്വത്തിലും, കൊടിയേറ്റ് നടക്കും. താന്ത്രിക വിധിപ്രകാരമുള്ള ക്ഷേത്രാചാരങ്ങള്‍ക്ക് പ്രാധാന്യം നല്‍കി കൊണ്ട് വിപുലമായ  ആഘോഷങ്ങളാണ് നടക്കുന്നത്.. 

തിരുവുത്സവത്തോട് അനുബന്ധിച്ചു ക്ഷേത്രം തന്ത്രിയുടെ മുഖ്യ കാര്‍മ്മികത്വത്തില്‍ ഉദയാസ്തമന പൂജ ജനുവരി 22നും മുറജപം ( യജ്ജുര്‍വേദം) ജനുവരി 25, 26, 27 തീയതികളിലും, ഉത്സവബലി 24, 25, 26, 27, 28 തീയതികളിലും നടക്കും.  ജനുവരി 29 ന്പള്ളിവേട്ട ദിവസം ഏഴ് ഗജവീരന്മാരുടെ എഴുന്നള്ളിപ്പ് ഉണ്ടായിരിക്കും.. രാവിലെ ശ്രീബലി എഴുന്നള്ളിപ്പിന്  കല്ലൂര്‍ ഉണ്ണികൃഷ്ണന്റെ നേതൃത്വത്തില്‍ അന്‍പതില്‍പരം കലാകാരന്മാര്‍ പങ്കെടുക്കുന്ന പഞ്ചാരിമേളം, വൈകിട്ട് 4 മണിക്ക്   പല്ലാവൂര്‍ ശ്രീധരന്‍ മാരാരും സംഘവും അവതരിപ്പിക്കുന്ന പഞ്ചവാദ്യം എന്നിവയും ഉണ്ടായിരിക്കും, രാത്രി 11 ന് പാണ്ടിമേളം കിടങ്ങൂര്‍ രാജേഷും സംഘവും അവതരിപ്പിക്കും. പാറമേക്കാവ് ദേവസ്വത്തിന്റെ നേതൃത്വത്തില്‍ വര്‍ണ്ണാഭമായ കുടമാറ്റവും ഉണ്ടായിരിക്കും. തിരുവരങ്ങില്‍ പള്ളിവേട്ട ദിവസം വൈകീട്ട് നന്ദഗോവിന്ദം ഭജന്‍സ് സാന്ദ്രാനന്ദലയം അവതരിപ്പിക്കും. തിരുവാതിര, പാഠകം, ചാക്യാര്‍ കൂത്ത്, ഓട്ടന്‍തുള്ളല്‍, വീരനാട്യം ഭക്തിഗാന നാമാര്‍ച്ചന, നൃത്തനൃത്ത്യങ്ങള്‍, ബാലഗോകുലത്തിലെ കുട്ടികളുടെ കൃഷ്ണായനം,  തുടങ്ങി വിവിധ കലാപരിപാടികള്‍ ഉത്സവ ദിവസങ്ങളില്‍ നടക്കും. ക്ഷേത്രപുരോഗതിക്കൊപ്പം തന്നെ സമാജത്തിന്റെ പുരോഗതിയും, ഓരോ ഭക്തന്റെയും ജീവിതത്തിന്റെ അടിസ്ഥാനപരമായ വിജയത്തിന്റെ കാല്‍വെയ്പ്പ് കൂടി ആകണമെന്നുള്ള ലക്ഷ്യമത്താടെയാണ് പൂവരണി ദേവസ്വം കമ്മറ്റി പ്രവര്‍ത്തിച്ചുവരുന്നത്. ക്ഷേത്രത്തിലെത്തുന്ന ഓരോ ഭക്തരുടെയും സമര്‍പ്പണങ്ങള്‍ ക്ഷേത്ര വികസനത്തിന് വിനിയോഗിക്കുന്നതോടൊപ്പം തന്നെ സമാജത്തിലെ സാമ്പത്തികമായി ദുരിതം അനുഭവിക്കുന്ന ഭക്തരുടെ ഉന്നമനത്തിനും കൂടി വിനിയോഗിക്കുക എന്ന ലക്ഷ്യവുമായി ഈ വര്‍ഷത്തെ തിരുവുത്സവത്തോടനുബന്ധിച്ച് നിര്‍ദ്ധനയായ ഒരു പെണ്‍കുട്ടിയുടെ വിവാഹം ഏറ്റെടുത്ത് നടത്തിക്കൊടുക്കുവാന്‍ തീരുമാനിച്ചതായും ക്ഷേത്രഭാരവാഹികള്‍ പറഞ്ഞു. ചില തല്‍പ്പരകക്ഷികള്‍ക്ക് ക്ഷേത്രത്തിന്റെ ഉടമസ്ഥാവകാശം സ്ഥാപിച്ചു കിട്ടുന്നതിനായി സമര്‍പ്പിച്ചിരുന്ന കേസില്‍ സ്വാമിയാര്‍ മഠത്തിന് അനുകൂലമായി വന്ന കോടതി വിധിയിലൂടെ ഭക്തജനങ്ങള്‍ക്ക് ഉണ്ടായിരുന്ന ആശങ്കകള്‍ മാറുകയും ഭക്തജനങ്ങള്‍ ധാരാളമായി ക്ഷേത്രത്തില്‍ ദര്‍ശനം നടത്തുന്ന സാഹചര്യങ്ങളും ഇപ്പോള്‍ സംജാതമായിരിക്കുക ആണ്. തൃശ്ശിവപേരൂര്‍ സ്വാമിയാര്‍ മഠത്തിലെ വാസുദേവാനന്ദ ബ്രഹ്‌മാനന്ദ ഭൂതി  മൂപ്പില്‍ സ്വാമിയാര്‍ തിരുമനസിന്റെ പൂര്‍ണ്ണമായ അനുവാദത്തോടുകൂടി പ്രവര്‍ത്തനം ആരംഭിച്ചിരിക്കുന്ന ക്ഷേത്രകമ്മറ്റിയുടെ, പ്രവര്‍ത്തനങ്ങള്‍ക്ക് എല്ലാ ഭക്തരുടെയും അകമഴിഞ്ഞ സഹായ സഹകരണങ്ങള്‍ ഉണ്ടാകണമെന്നും പൂവരണി ക്ഷേത്രം ഭാരവാഹികള്‍ വാര്‍ത്തസമ്മേളനത്തില്‍ അറിയിച്ചു.വാര്‍ത്താ സമ്മേളനത്തില്‍ ക്ഷേത്രം മുതല്‍പിടി സജീവ്കുമാര്‍, ക്ഷേത്രം മേല്‍ശാന്തി കല്ലംപളളി ഇല്ലത്ത് വിഷ്ണു നമ്പൂതിരി, രക്ഷാധികാരി K K ഗോപകുമാരന്‍ നായര്‍, കണ്‍വീനര്‍ കല്ലംപള്ളി ഇല്ലം KN നാരായണന്‍ നമ്പൂതിരി, പ്രസിഡന്റ് സുനില്‍ കുമാര്‍ V K, സെക്രട്ടറി T രാജേഷ്, ട്രഷറര്‍ രാജേഷ് B നായര്‍, വൈസ് പ്രസിഡന്റ് സതീഷ് കുമാര്‍ കല്ലക്കുളം എന്നിവര്‍ പങ്കെടുത്തു.