ലഹരിവിരുദ്ധ റാലി നടത്തി

പൂവരണി തിരുഹൃദയ സണ്‍ഡേ സ്‌കൂളിലെ വിശ്വാസോത്സവത്തിന്റെ സമാപനത്തോടനുബന്ധിച്ച് മിഷന്‍ ലീഗിന്റെ നേതൃത്വത്തില്‍ ലഹരിവിരുദ്ധ റാലി നടത്തി. പൂവരണി പള്ളി അങ്കണത്തില്‍ നിന്നും അസിസ്റ്റന്റ് വികാരി ഫാ. ആന്റണി വില്ലന്താനത്ത് റാലി ഫ്‌ലാഗ് ഓഫ് ചെയ്തു. വിളക്കുംമരുത് ജംഗ്ഷനിലേക്ക് ലഹരി വിരുദ്ധ മുദ്രാവാക്യങ്ങള്‍ വിളിച്ച് പ്ലക്കാര്‍ഡുകളേന്തി കുട്ടികള്‍ റാലി നടത്തി. ലഹരി വിരുദ്ധ ഗാനം, മൈം, ടാബ്ലോ എന്നിവ അവതരിപ്പിച്ചു കൊണ്ടും പൊതുജനങ്ങള്‍ക്ക് ലഹരിയുടെ ദൂഷ്യഫലങ്ങളെ കുറിച്ച് കുട്ടികള്‍ അവബോധം നല്‍കി. റാലി വിളക്കുംമരുത് ജംഗ്ഷനില്‍ എത്തിയപ്പോള്‍ കുട്ടികള്‍ അവതരിപ്പിച്ച ഫ്‌ലാഷ് മോബ് ലഹരിയുടെ അപകട സാധ്യതകളിലേക്ക് വിരല്‍ ചൂണ്ടുന്നതായിരുന്നു. 

ലഹരി സമൂഹത്തില്‍ സൃഷ്ടിക്കുന്ന ഭയാനകരമായ അവസ്ഥയെ കുറിച്ച് കുട്ടികള്‍ക്ക് ബോദ്ധ്യമുണ്ടാകണമെന്നും ലഹരിയുടെ അപകട സാധ്യത തിരിച്ചറിയാനുള്ള ബുദ്ധിയും കഴിവും കുട്ടികള്‍ ആര്‍ജ്ജിച്ചെടുക്കണമെന്നും പൂവരണി തിരുഹൃദയ പള്ളി വികാരി ഫാ. ജോസഫ് മഠത്തിക്കുന്നേല്‍ പറഞ്ഞു. ലഹരിയെക്കുറിച്ച് കുട്ടികള്‍ക്കും കുട്ടികളിലൂടെ സമൂഹത്തിനും അവബോധം കൊടുക്കുന്നതിനാണ് വിളക്കുംമരുതില്‍ ഫ്‌ലാഷ് മോബ് സംഘടിപ്പിച്ചത്. പരിപാടികള്‍ക്ക് ഹെഡ്മാസ്റ്റര്‍ മനു കൂനാനിക്കല്‍, മിഷന്‍ ലീഗ് പ്രസിഡന്റ് ജിബിന്‍ മണിയഞ്ചിറ, ആനിമേറ്റേഴ്‌സായ ജിബിന്‍ കല്ലക്കുളം, അല്‍ഫോന്‍സാ ഷാജി, ഷെറിന്‍ സെബാസ്റ്റ്യന്‍, അനിറ്റാ സിബി, കോര്‍ഡിനേറ്റേഴ്‌സായ റ്റിന്‍സി ബാബു, ജിലു ജിജി, ആന്‍മരിയ സജി, ജിയ ജിജി എന്നിവര്‍ നേതൃത്വം നല്കി.