കട്ടച്ചിറ ചെക്ക്ഡാം ഭാഗത്തെ മാലിന്യനിക്ഷേപകേന്ദ്രം മിനിപാര്‍ക്കായി മാറി. കിടങ്ങൂര്‍ പഞ്ചായത്തിലെ കട്ടച്ചിറ ചെക്ക്ഡാം പരിസരം മാലിന്യങ്ങള്‍ വലിച്ചെറിഞ്ഞും സാമൂഹ്യവിരുദ്ധ ശല്യങ്ങളിലൂടെയും പ്രദേശവാസികള്‍ക്ക ദുരിതമായി മാറിയിരുന്നു. കുളിക്കാനായി ചെക്ക്ഡാമില്‍ ഇറങ്ങിയ പന്ത്രണ്ടോളം ആളുകള്‍ക്ക ജീവന്‍ നഷ്ടപ്പെടുകയും ചെയ്തിരുന്നു. ജില്ലാ പഞ്ചായത്തിന്റെ പദ്ധതിയില്‍ ഉള്‍പ്പെടുത്തി ജില്ലാ പഞ്ചായത്ത് മെമ്പര്‍ ജോസ്മോന്‍ മുണ്ടയ്ക്കല്‍ അനുവദിച്ച 10 ലക്ഷം രൂപയില്‍ നിന്നും 5 ലക്ഷം രൂപ ഉപയോഗിച്ചുള്ള ഒന്നാംഘട്ട പ്രവര്‍ത്തനങ്ങള്‍ പൂര്‍ത്തീകരിച്ചാണ് മിനി പാര്‍ക്ക് യാഥാര്‍ത്ഥ്യമാക്കിയത്. കിടങ്ങൂര്‍ പഞ്ചായത്തിന്റെ പതിമൂന്നാം വാര്‍ഡില്‍ ചെക്ക്ഡാമിലേക്ക് ഇറങ്ങുന്ന ഭാഗത്ത് സംരക്ഷണഭിത്തികളും സ്റ്റീല്‍ പൈപ്പ് ഉപയോഗിച്ചുള്ള വേലികളും ഗെയ്റ്റും സ്ഥാപിക്കുകയും ചെക്ക്ഡാമിലേക്കുള്ള നടപ്പാത കോണ്‍ക്രീറ്റിംഗ് നടത്തുകയും അപകടസൂചനാ ബോര്‍ഡുകള്‍ സ്ഥാപിക്കുകയും ചെയ്തു.
കൂടാതെ ചെക്ക്ഡാമിലെ വെള്ളച്ചാട്ടം കാണുന്നതിനായി സ്റ്റീല്‍ പൈപ്പുകൊണ്ടുള്ള ഇരിപ്പിടങ്ങള്‍ ക്രമീകരിക്കുകയും ടൈല്‍ വിരിച്ച് പരിസരം മനോഹരമാക്കുകയും ചെയ്തു. രാത്രികാലങ്ങളിലെ സാമൂഹ്യവിരുദ്ധശല്യങ്ങള്‍ പൂര്‍ണ്ണമായും ഒഴിവാക്കുന്നതിനായി ജില്ലാ പഞ്ചായത്ത് മെമ്പര്‍ ജോസ്മോന്‍ മുണ്ടയ്ക്കല്‍ ചെക്ക്ഡാമിന് മുമ്പില്‍ മിനിമാസ്റ്റ് ലൈറ്റ് സ്ഥാപിക്കുകയും പാമ്പാടി ബ്ലോക്ക് പഞ്ചായത്തിന്റെ പദ്ധതിയില്‍ ഉള്‍പ്പെടുത്തി ബ്ലോക്ക് പഞ്ചായത്ത് മെമ്പര്‍ പ്രൊഫ. ഡോ. മേഴ്സി ജോണ്‍ മുഖേന അനുവദിച്ച ഫണ്ട് ഉപയോഗിച്ച് സിസിടിവിയും സ്ഥാപിച്ചു. ഈ പ്രവര്‍ത്തനങ്ങള്‍ എല്ലാം പൂര്‍ത്തീകരിച്ചതോടെ മാലിന്യം വലിച്ചെറിയുന്ന കേന്ദ്രമായിരുന്ന ചെക്ക്ഡാം പരിസരം മനോഹരമായ മിനിപാര്‍ക്കായി മാറി. രണ്ടാം ഘട്ടമായി ചെക്ക്ഡാമിന്റെ മറുകരയില്‍ പന്ത്രണ്ടാം വാര്‍ഡിന്റെ ഭാഗത്തും ആവശ്യമായ സുരക്ഷാക്രമീകരണങ്ങള്‍ ഏര്‍പ്പെടുത്തിക്കൊണ്ട് മനോഹരമാക്കാനാണ് ലക്ഷ്യമിടുന്നത്.
കിടങ്ങൂര്‍ പഞ്ചായത്ത് പതിമൂന്നാം വാര്‍ഡില്‍ പ്രവര്‍ത്തിച്ചുവരുന്ന പുഴയോരം റെസിഡന്‍സ് അസോസിയേഷനാണ് ഈ പ്രവര്‍ത്തനങ്ങള്‍ ഏകോപിപ്പിക്കുന്നതിന് നേതൃത്വം വഹിച്ചത്. ഒന്നാംഘട്ട നിര്‍മ്മാണം പൂര്‍ത്തീകരിച്ച മിനി പാര്‍ക്കിന്റെ ഉദ്ഘാടനം ജില്ലാ പഞ്ചായത്ത് മെമ്പര്‍ ജോസ്മോന്‍ മുണ്ടയ്ക്കല്‍ നിര്‍വ്വഹിച്ചു. ഗ്രാമപഞ്ചായത്ത് പ്രസിഡന്റ് അഡ്വ. ഇ.എം. ബിനു അദ്ധ്യക്ഷനായിരുന്നു. പുഴയോരം റെസിഡന്റ്സ് അസോസിയേഷന്‍ പ്രസിഡന്റും ബ്രില്യന്റ് സ്റ്റഡി സെന്റര്‍ ഡയറക്ടറുമായ ബി. സന്തോഷ് കുമാര്‍ മുഖ്യപ്രഭാഷണം നടത്തി. ബ്ലോക്ക് പഞ്ചായത്ത് മെമ്പര്‍ പ്രൊഫ. ഡോ. മേഴ്സി ജോണ്‍ ഗ്രാമപഞ്ചായത്ത് മെമ്പര്‍ രശ്മി രാജേഷ് തുടങ്ങിയവര്‍പ്രസംഗിച്ചു.
0 Comments