ജലറാണി കുടിവെള്ള പദ്ധതിയുടെ പുതിയ ഓവര്‍ ഹെഡ് ടാങ്ക് നിര്‍മ്മാണം ആരംഭിച്ചു.

ജില്ലാ പഞ്ചായത്ത് മെമ്പര്‍ രാജേഷ് വാളിപ്ലാക്കല്‍ അനുവദിച്ച ഫണ്ട് ഉപയോഗിച്ച് ഭരണങ്ങാനം പഞ്ചായത്തിലെ കാഞ്ഞിരമറ്റം വാര്‍ഡില്‍ ജലറാണി കുടിവെള്ള പദ്ധതിയുടെ പുതിയ ഓവര്‍ ഹെഡ് ടാങ്ക് നിര്‍മ്മാണം ആരംഭിച്ചു. ജില്ലാ പഞ്ചായത്ത് ഫണ്ടില്‍ നിന്നും ജില്ലാ പഞ്ചായത്ത് മെമ്പര്‍ രാജേഷ് വാളിപ്ലാക്കല്‍ അനുവദിച്ച 15 ലക്ഷം രൂപ ഉപയോഗിച്ചാണ് ടാങ്ക് നിര്‍മ്മിക്കുന്നത്. വേഴാങ്ങാനം പള്ളി പാരിഷ് ഹാളില്‍ നടന്ന ചടങ്ങില്‍ ജില്ലാ പഞ്ചായത്ത് മെമ്പര്‍ രാജേഷ് വാളിപ്ലാക്കല്‍ നിര്‍മ്മാണ  ഉദ്ഘാടനം നിര്‍വഹിച്ചു. പഞ്ചായത്ത് മെമ്പര്‍ സുധാ ഷാജി അധ്യക്ഷത വഹിച്ചു.പഞ്ചായത്ത് പ്രസിഡന്റ് ബീന ടോമി മുഖ്യപ്രഭാഷണം നടത്തി. 

70 ഓളം കുടുംബങ്ങളാണ് ജലറാണി കുടിവെള്ള പദ്ധതിയില്‍ ഉള്‍പ്പെട്ടിരിക്കുന്നത്. നിലവിലുള്ള ടാങ്കിന് ഉയരമില്ലാത്തതിനാല്‍ വേനല്‍ക്കാലത്ത് പല വീടുകളിലും വെള്ളം ലഭിക്കുന്നതിന് ബുദ്ധിമുട്ടുണ്ടായിരുന്ന സാഹചര്യത്തിലാണ് 20000 ലിറ്റര്‍ സംഭരണ ശേഷിയുള്ള പുതിയ ടാങ്ക് നിര്‍മ്മിക്കുന്നത്. ഇതോടെ കൂടുതല്‍ വീടുകളില്‍ പൈപ്പ് കണക്ഷന്‍ നല്‍കുവാനും സാധിക്കും. പദ്ധതിയുടെ കിണര്‍ സ്ഥിതി ചെയ്യുന്ന കാഞ്ഞിരമറ്റത്തു നിന്നും 300 മീറ്റര്‍ അകലെ വേഴാങ്ങാനം നവനസ്രത്ത്  പള്ളി സൗജന്യമായി നല്‍കിയ സ്ഥലത്താണ് ടാങ്ക് നിര്‍മ്മിക്കുന്നത്. സമ്മേളനത്തില്‍ പള്ളി വികാരി ഫാദര്‍ ജോസഫ് പര്യപ്പനാല്‍ , പദ്ധതി പ്രസിഡന്റ് വി.വി വിജയന്‍,  സെക്രട്ടറി ആലിസ് മൈക്കിള്‍, ത്രിതല പഞ്ചായത്ത് അംഗങ്ങള്‍, രാഷ്ട്രീയ പാര്‍ട്ടി പ്രതിനിധികള്‍, ജലനിധി ഭാരവാഹികള്‍, തുടങ്ങിയവര്‍ പ്രസംഗിച്ചു.