അയ്മനം പഞ്ചായത്തിലെ വികസന സദസ്സ് സഹകരണ തുറമുഖ ദേവസ്വം വകുപ്പുമന്ത്രി വി.എന്‍ വാസവന്‍ ഉദ്ഘാടനം ചെയ്തു.കേരളത്തിന്റെ സമഗ്ര പുരോഗതി ലക്ഷ്യമിട്ടുള്ള പ്രവര്‍ത്തനങ്ങളാണ് സംസ്ഥാന സര്‍ക്കാര്‍ ആവിഷ്‌കരിച്ചു നടപ്പാക്കുന്നതെന്ന് മന്ത്രി വി.എന്‍. വാസവന്‍ പറഞ്ഞു. അതിദരിദ്രര്‍ ഇല്ലാത്ത സംസ്ഥാനമായി നവംബര്‍ ഒന്നിന് സംസ്ഥാനത്തെ പ്രഖ്യാപിക്കുമ്പോള്‍ നമ്മള്‍ ലോകത്തിന് തന്നെ മാതൃകയായി മാറുമെന്നും മന്ത്രി പറഞ്ഞു. വിദ്യാഭ്യാസ, ആരോഗ്യ മേഖലകളില്‍ സമാനതകളില്ലാത്ത മുന്നേറ്റമാണ് കേരളത്തിനുണ്ടായത്. അയ്മനം ഗ്രാമപഞ്ചായത്തില്‍ അതിവിപുലമായ വികസന പ്രവര്‍ത്തനങ്ങളാണ് നടപ്പിലാക്കിയതെന്നും അദ്ദേഹം പറഞ്ഞു. പള്‍സ് പോളിയോ വിതരണത്തിന്റെ ഗ്രാമ പഞ്ചായത്തുതല ഉദ്ഘാടനവും മന്ത്രി നിര്‍വഹിച്ചു. ഗ്രാമപഞ്ചായത്ത് ഹാളില്‍ നടന്ന പരിപാടിയില്‍ പ്രസിഡന്റ് വിജി രാജേഷ് അധ്യക്ഷത വഹിച്ചു.പഞ്ചായത്തിന്റെ കഴിഞ്ഞ വര്‍ഷങ്ങളിലെ വികസന നേട്ടങ്ങള്‍ ഗ്രാമപഞ്ചായത്ത് സെക്രട്ടറി മിനി തോമസും സംസ്ഥാന സര്‍ക്കാരിന്റെ വികസന നേട്ടങ്ങള്‍ റിസോഴ്‌സ് പേഴ്‌സണ്‍ ബിലാല്‍ കെ.റാമും അവതരിപ്പിച്ചു.
0 Comments