105 കാരിയായ മറിയം തോമസ്, ഇത്തവണയും വോട്ട് രേഖപ്പെടുത്തുവാനുള്ള ഒരുക്കത്തിലാണ്

105 കാരിയായ   മറിയം തോമസ്, ഇത്തവണയും തദ്ദേശ തെരഞ്ഞെടുപ്പില്‍ വോട്ട് രേഖപ്പെടുത്തുവാനുള്ള ഒരുക്കത്തിലാണ്. ഏറ്റുമാനൂര്‍ വള്ളിക്കാട് സ്വദേശിനിയായ വയോധികയുടെ 105 -ാമത് ജന്മദിനം നവംബര്‍ 13ന് മക്കളും അഭ്യുദയകാംഷികളും അയല്‍പക്കക്കാരും ചേര്‍ന്ന് ആഘോഷിച്ചു. കഴിഞ്ഞ തവണയും തദ്ദേശ തിരഞ്ഞെടുപ്പില്‍ വോട്ട് രേഖപ്പെടുത്തിയിരുന്നു.  കുറുമുള്ളൂര്‍ സ്വദേശിനിയായിരുന്ന മറിയം തോമസ് വള്ളിക്കാട് സ്വദേശി തോമസ് ചെറുവള്ളിയുടെ ഭാര്യയാണ്.  

കാര്‍ഷികവൃത്തിയിലൂടെ ജീവിതം മുന്നോട്ടു കൊണ്ടു പോകുന്ന കുടുംബത്തില്‍ നാലു മക്കളും  കൊച്ചുമക്കളും അവരുടെ മക്കളുമായി 31 അംഗങ്ങള്‍ ഉണ്ട്. എന്നാല്‍ 105ന്റെ നിറവിലെത്തിയ ഈ വയോധികയുടെ പ്രിയപ്പെട്ട കൂട്ടുകാരി അയല്‍പക്കത്തെ നാലു വയസ്സുകാരി ദക്ഷ വിനീതാണ്.പുലര്‍ച്ചെ അഞ്ചുമണിയോടെ ഉണരുന്ന മറിയം തോമസ്, കുളിയും  പ്രാര്‍ത്ഥനയും  കഴിഞ്ഞു മാത്രമേ ഭക്ഷണം കഴിക്കുകയുള്ളു. കപ്പയും മീനും ആണ് പ്രിയം.  തറവാട്ട് വീട്ടില്‍ ഇളയ മകന്‍ സിബിയുടെയും ഭാര്യയുടെയും സംരക്ഷണത്തിലാണ് മറിയം തോമസ് കഴിയുന്നത്. 105-ാം ജന്മദിനം നഗരസഭ കൗണ്‍സിലര്‍ വി.എസ് വിശ്വനാഥന്റെയും, മുന്‍ നഗരസഭ അധ്യക്ഷ ജയശ്രീ ഗോപിക്കുട്ടന്റെയും സഹപ്രവര്‍ത്തകരുടെയും സാന്നിധ്യത്തില്‍ ആഘോഷിച്ചു. അമ്മാമ്മയെ  പൊന്നാട അണിയിച്ചും  കേക്കുമുറിച്ചുമാണ് ആഘോഷിച്ചത്. കൊടുവത്താനം സെന്റ് ജോസഫ് ക്‌നാനായ പള്ളിയിലെ വിവാഹ രജിസ്റ്റര്‍ പരിശോധിച്ചാണ് മകന്‍ സിബി അമ്മയുടെ പ്രായം തിരിച്ചറിഞ്ഞത്.