സംസ്ഥാന ശാസ്ത്രമേളയിലും മരങ്ങാട്ടുപിളളി സെന്റ് തോമസ് ഹൈസ്‌കൂളിന്റെ വിജയക്കുതിപ്പ്. നവംബര്‍ 7 മുതല്‍ 10 വരെ പാലക്കാട്ട് ഭാരത് മാതാ എച്ച്എസ്എസില്‍ നടന്ന സംസ്ഥാന ശാസ്ത്രമേളയില്‍ HS വിഭാഗത്തില്‍ മരങ്ങാട്ടുപിള്ളി സെന്റ് തോമസ് ഹൈസ്‌കൂള്‍ രണ്ടാം സ്ഥാനം നേടി. പങ്കെടുത്ത നാലു ഇനങ്ങളില്‍ നിന്നുമായി 25 പോയിന്റ് തേടിയാണ് സംസ്ഥാനതലത്തില്‍ രണ്ടാമത് എത്തിയത്. ഇന്‍വെസ്റ്റിഗേറ്ററി പ്രൊജക്റ്റ് ഇനത്തില്‍ സംസ്ഥാനതലത്തില്‍ ഒന്നാം സ്ഥാനവും നേടി. തുടര്‍ച്ചയായി മൂന്നാം വര്‍ഷവും ഏതെങ്കിലും ഒരു മത്സര ഇനത്തില്‍ സംസ്ഥാനതലത്തില്‍ ഒന്നാം സ്ഥാനം നേടുക എന്ന അപൂര്‍വ്വ ബഹുമതിയും മരങ്ങാട്ടുപിള്ളി സെന്റ്‌തോമസ് ഹൈസ്‌കൂള്‍ സ്വന്തമാക്കി.
സ്‌കൂളിലെ പത്താം ക്ലാസ് വിദ്യാര്‍ത്ഥി ജോയല്‍ ജോബി ഇന്‍വെസ്റ്റിഗേറ്ററി പ്രോജക്ട് വിഭാഗത്തില്‍ സംസ്ഥാനതലത്തില്‍ ഒന്നാം സ്ഥാനം കരസ്ഥമാക്കി. ചെറുതേനീച്ചകളുടെ ആഹാരരീതിയില്‍ വരുത്തുന്ന മാറ്റം തേനുല്‍പാദനത്തെ എങ്ങനെ ബാധിക്കും എന്ന് പഠനത്തിനാണ് ജോയല്‍ ജോബിക്ക് ഒന്നാം സ്ഥാനം ലഭിച്ചത്. 2026 ജനുവരിയില്‍ തെലുങ്കാനയില്‍ നടക്കുന്ന സതേണ്‍ ഇന്ത്യ സയന്‍സ് ഫെയറില്‍ പങ്കെടുക്കാനുള്ള യോഗ്യതയും ജോയല്‍ ജോബിക്ക് ലഭിച്ചു. ഇന്റര്‍നെറ്റ് ഓഫ് തിങ്ങ്‌സ് വിഭാഗത്തില്‍ പത്താം ക്ലാസ് വിദ്യാര്‍ത്ഥി ജോസ്ബിന്‍ ജോഷി സംസ്ഥാന തലത്തില്‍ നാലാം സ്ഥാനം നേടി പുതുതലമുറയ്ക്ക് ഇണങ്ങും വിധം സംയോജിത കൃഷി ഇന്റര്‍നെറ്റ് സഹായത്തോടെ ഓഫീസില്‍ ഇരുന്ന് എങ്ങനെ ചെയ്യാം എന്ന മാതൃക തയ്യാറാക്കിയാണ് സംസ്ഥാനതലത്തില്‍ നാലാം സ്ഥാനം കരസ്ഥമാക്കിയത്. വര്‍ക്കിംഗ് മോഡല്‍ വിഭാഗത്തില്‍ പത്താം ക്ലാസ് വിദ്യാര്‍ത്ഥിനികളായ അല്‍വിന ജോമോന്‍, ഡെവീന സിബി എന്നിവരും നാലാം സ്ഥാനം കരസ്ഥമാക്കി. ഇവര്‍ നിര്‍മ്മിച്ച സൗരോര്‍ജ്ജം ഉപയോഗിച്ച് പാളങ്ങള്‍ ഇല്ലാതെ തൂണുകളിലുടെ മാത്രം ഓടുന്ന ട്രെയിനിന്റെ മാതൃക എക്‌സിബിഷന്‍ സന്ദര്‍ശിക്കാന്‍ എത്തിയവരെ ഏറെ ആകര്‍ഷിച്ചിരുന്നു. രണ്ടാം തവണയാണ് ഇരുവരും സംസ്ഥാനതലത്തില്‍ മത്സരിക്കുന്നത്. സയന്‍സ് ഇംപ്രോവൈസ്ഡ് എക്‌സ്പിരിമെന്റ് വിഭാഗത്തില്‍ ഹന്ന എലിസബത്ത് റോജി യും അനുഷ സാജന്‍ നും അവതരിപ്പിച്ച ഇലക്ട്രോമാഗ്‌നെറ്റിസവുമായി ബന്ധപ്പെട്ട പരീക്ഷണങ്ങളും A ഗ്രേഡിന് അര്‍ഹമായി. ഗണിതശാസ്ത്ര മേളയില്‍ നമ്പര്‍ ചാര്‍ട്ട് ഇനത്തില്‍ പത്താം ക്ലാസ് വിദ്യാര്‍ത്ഥിനി അനഘ സന്തോഷ് സംസ്ഥാനതലത്തില്‍ A ഗ്രേഡ് കരസ്ഥമാക്കി. കഴിഞ്ഞ മൂന്ന് വര്‍ഷങ്ങളായി ഗണിത ശാസ്ത്രമേളയില്‍ നമ്പര്‍ ചാര്‍ട്ട് വിഭാഗത്തില്‍ അനഘ സന്തോഷ് സബ്ജില്ലാ ജില്ലാതല മത്സരങ്ങളില്‍ പങ്കെടുക്കുകയും ഒന്ന്, രണ്ട് സ്ഥാനങ്ങള്‍ കരസ്ഥമാക്കുകയും ചെയ്തിരുന്നു. ഗണിത ശാസ്ത്ര വിഭാഗത്തിലെ പാസ്‌ക്കല്‍ ട്രയാങ്കിളുമായി ബന്ധപ്പെട്ടതായിരുന്നു അനഘയുടെ നമ്പര്‍ ചാര്‍ട്ട്. സബ്ജില്ല, ജില്ലാ ശാസ്ത്രമേളയിലും മരങ്ങാട്ടുപിള്ളി സെന്റ് തോമസ് ഹൈസ്‌കൂള്‍ ഓവറോള്‍ ചാമ്പ്യന്‍ഷിപ്പും നിരവധി സമ്മാനങ്ങളുംനേടിയിരുന്നു.
.jpg)
0 Comments