സ്ഥാനാര്‍ത്ഥികളുടെ ചിഹ്നം ആലേഖനം ചെയ്ത മുണ്ടും ഷര്‍ട്ടുമായി വസ്ത്ര വ്യാപാരികള്‍

ഇലക്ഷന്‍ അടുത്തതോടെ സ്ഥാനാര്‍ത്ഥികളും പ്രവര്‍ത്തകരും മുണ്ടും ഷര്‍ട്ടുമണിഞ്ഞ് പ്രചരണരംഗത്ത് സജീവമാകുകയാണ്. ഈ അവസരത്തില്‍ സ്ഥാനാര്‍ത്ഥികളുടെ ചിഹ്നം ആലേഖനം ചെയ്ത

മുണ്ടും ഷര്‍ട്ടുമായി വസ്ത്രവ്യാപാരികളും രംഗത്തിറങ്ങി. വരാനിരിക്കുന്ന തദ്ദേശ തെരഞ്ഞെടുപ്പ് ആഘോഷമാക്കുകയാണ് കൈത്തറി വസ്ത്ര വ്യാപാരികള്‍. വിവിധ പാര്‍ട്ടികളുടെ ചിഹ്നങ്ങള്‍ ആലേഖനം ചെയ്ത മുണ്ടുകളും, ദോത്തികളും, ഷര്‍ട്ടുകളും  വിപണിയില്‍ സുലഭമായി.  ഉത്സവങ്ങള്‍ക്കും വിവാഹങ്ങള്‍ക്കുമൊക്കെ ട്രെന്‍ഡിങ്ങായിരുന്ന ദേവീ, ദേവന്മാരുടെ ചിത്രങ്ങള്‍ ആലേഖനം ചെയ്ത വസ്ത്രങ്ങള്‍ പോലെ ഇപ്പോള്‍ പാര്‍ട്ടി ചിഹ്നങ്ങള്‍ ആലേഖനം ചെയ്ത വസ്ത്രങ്ങളും ഇപ്പോള്‍  ട്രെന്‍ഡിങ് ആണ്. 

കൈത്തറി വസ്ത്രങ്ങളുടെ ഓണ്‍ലൈന്‍ സ്റ്റോറായ മല്‍ഹാര്‍ ലൂംസാണ് ഇത്തരം വസ്ത്രങ്ങള്‍ മധ്യകേരളത്തിലും തെക്കന്‍ കേരളത്തിലും ഇപ്പോള്‍ എത്തിക്കുന്നത്. വടക്കന്‍ കേരളത്തില്‍ ഇത്തരം മുണ്ടുകള്‍ ലഭ്യമായിത്തുടങ്ങിയിരുന്നെങ്കിലും മധ്യകേരളത്തില്‍ വലിയ പ്രചാരം ലഭിച്ചിരുന്നില്ല. എന്നാല്‍, ഇപ്പോള്‍ നൂറുകണക്കിനാളുകള്‍ ഇത്തരം വസ്ത്രങ്ങള്‍ എവിടെ കിട്ടുമെന്ന് അന്വേഷിക്കുന്ന സാഹചര്യത്തിലാണ് ഇത്തരം മുണ്ടുകള്‍ ഒരുക്കാന്‍ തീരുമാനിച്ചതെന്ന് മല്‍ഹാര്‍ ലൂംസ് ഉടമകളിലൊരാളായ ശ്രീകാന്ത് എസ് ശ്രീലകം പറഞ്ഞു. വിവിധ ക്വാളിറ്റിയിലുള്ള മുണ്ടുകളില്‍ വത്യസ്ത  തരത്തിലുള്ള പ്രിന്റിങ്ങാണ് ചെയ്യുന്നത്. 200 രൂപ മുതല്‍ മുകളിലേക്കാണ്  മുണ്ടുകളുടെ വില. രാഷ്ട്രീയ നേതാക്കളുടെയും സ്ഥാനാര്‍ഥികളുടെയും ചിത്രങ്ങള്‍ ആലേഖനം ചെയ്ത ഷര്‍ട്ടുകളും ആവശ്യക്കാരുടെ താത്പര്യപ്രകാരം ഡിസൈന്‍ ചെയ്ത് നല്‍കുമെന്നും മല്‍ഹാര്‍ ലൂംസിന്റെ ഉടമകള്‍ പറഞ്ഞു. സംഭവം ക്ലിക്കായതോടെ  മല്‍ഹാര്‍ ലൂസിന്റെ  വാട്ട് സാപ്പ് ഗ്രൂപ്പിലും സോഷ്യല്‍ മീഡിയ പേജുകളിലും ഇത്തരം വസ്ത്രങ്ങളുടെ ഓര്‍ഡര്‍ ഏറിയിരിക്കുകയാണ്. തെരഞ്ഞെടുപ്പു കാലത്ത് പ്രവര്‍ത്തനങ്ങള്‍ ഏകോപിപ്പിക്കാന്‍ ചിത്രങ്ങളും ചിഹ്നങ്ങളും ആലേഖനം ചെയ്ത മുണ്ടും ഷര്‍ട്ടും പ്രയോജനപ്പെടും. ഈ വര്‍ഷത്തെ ഇലക്ഷന്‍ കാലത്ത് സ്ഥാനാര്‍ത്ഥികളുടെ ചിത്രവും ചിഹ്നവും പതിച്ച മുണ്ടുകളും ഷര്‍ട്ടുകളം കൗതുക കാഴ്ചയൊരുക്കും. ഇത്തരം മുണ്ടുകളും ഷര്‍ട്ടുകളും  ആവശ്യമുള്ളവര്‍ക്ക് വിളിക്കേണ്ട നമ്പര്‍ - 8943030470.