നവീകരണം പൂര്‍ത്തിയാക്കിയ പദ്ധതികളുടെ സമര്‍പ്പണോത്സവം

മേലമ്പാറ ശ്രീ ധര്‍മ്മ ശാസ്താ ക്ഷേത്രത്തിലെ നവീകരണം പൂര്‍ത്തിയാക്കിയ പദ്ധതികളുടെ സമര്‍പ്പണോത്സവം നവംബര്‍ 15 ശനിയാഴ്ച നടക്കും. ആനക്കൊട്ടില്‍, നവീകരിച്ച ക്ഷേത്ര ഗോപുരങ്ങള്‍, പ്രദക്ഷിണ വഴി, വിപുലീകരിച്ച സര്‍പ്പക്കാവും നടപ്പന്തലും, കിഴക്കുവശത്തെ ക്ഷേത്ര മതില്‍ എന്നിവയുടെ സമര്‍പ്പണമാണ് നടക്കുന്നത്. 1998-2010 കാലഘട്ടത്തിലെ ഭരണസമിതി തുടങ്ങിവെച്ച നിര്‍മാണ പ്രവര്‍ത്തികളാണ് പൂര്‍ത്തീകരിച്ചത്. ശനിയാഴ്ച രാവിലെ 9.30ന് തിരുവിതാംകൂര്‍ യുവരാജാവായ അവിട്ടം തിരുനാള്‍ ആദിത്യവര്‍മ്മ  ഉദ്ഘാടനം നിര്‍വഹിക്കും. ക്ഷേത്രം തന്ത്രി മറ്റപ്പള്ളി പരമേശ്വരന്‍ നമ്പൂതിരി അനുഗ്രഹ പ്രഭാഷണം നടത്തും. ദേവസ്വം പ്രസിഡന്റ് രാജേഷ് പല്ലാട്ട് അധ്യക്ഷനായിരിക്കും. കൃഷ്ണശില പാകി പൂര്‍ത്തീകരിച്ച പ്രദക്ഷിണ വഴിയുടെ സമര്‍പ്പണം ഗുരുവായൂര്‍ ദേവസ്വം ബോര്‍ ഡ് മെംബര്‍ മനോജ് ബി നായര്‍ നിര്‍വഹിക്കും. 

മീനച്ചില്‍ താലൂക്ക് എസ്എന്‍ഡിപി യൂണിയന്‍ ചെയര്‍മാന്‍ സുരേഷ് ഇട്ടികുന്നേല്‍ മുഖ്യാതിഥിയായിരിക്കും. ആനക്കൊട്ടിലിലേയ്ക്ക് ആദ്യപ്രവേശന നടത്തുന്നത് ഗജോത്തമന്‍ പല്ലാട്ട് ബ്രഹ്‌മദത്തനാണ്. ചടങ്ങില്‍ അമ്പലപ്പുറം ക്ഷേത്ര ഉപദേശക സമിതി പ്രസിഡന്റ് പി.എന്‍ പരമേശ്വരന്‍ നായര്‍, ഭരണങ്ങാനം ശ്രീ കൃഷ്ണസ്വാമി ക്ഷേത്രം പ്രസിഡന്റ് കണ്ണന്‍ ശ്രീകൃഷ്ണവിലാസം, ഇഞ്ചോലിക്കാവ് ക്ഷേത്രം മാനേജര്‍ രാജേന്ദ്രന്‍ തമ്പി തുടങ്ങിയവര്‍ സംസാരിക്കും. ദേവസ്വം സെക്രട്ടറി അഭിലാഷ് ചക്കാലയ്ക്കല്‍ സ്വാഗതവും വനിതാ സമാജം പ്രസിഡന്റ് സുധ രഘു നന്ദിയും പറയും. ഈരാറ്റുപേട്ട പ്രസ് സെന്ററില്‍ നടന്ന വാര്‍ത്താ സമ്മേളനത്തില്‍ ദേവസ്വം പ്രസിഡന്റ് രാജേഷ് പല്ലാട്ട്, സെക്രട്ടറി അഭിലാഷ് സി.എന്‍, ട്രഷറര്‍ എം.കെ മധു സൂദനന്‍ കര്‍ത്ത, ജോ. സെക്രട്ടറി ശ്രീകാന്ത് ആര്‍ നായര്‍, നവീന്‍ മോഹന്‍ എന്നിവര്‍ പങ്കെടുത്തു.