വാഹനാപകടത്തില്‍ ജീവന്‍ നഷ്ടപ്പെട്ട റോസമ്മ അഞ്ച് പേര്‍ക്ക് പ്രകാശമാകുന്നു

പാലായില്‍ വാഹനാപകടത്തില്‍ ജീവന്‍ നഷ്ടപ്പെട്ട റോസമ്മ അഞ്ച് പേര്‍ക്ക് ജീവിതത്തില്‍ പ്രകാശമാകുന്നു. . കഴിഞ്ഞ ദിവസം പാലായില്‍ ഉണ്ടായ വാഹനാപകടത്തില്‍  മസ്തിഷ്‌കമരണം സംഭവിച്ച  പാലാ മുണ്ടുപാലം പുത്തേറ്റ് കുന്നേല്‍ വീട്ടില്‍ റോസമ്മ ഉലഹന്നാന്റെ (66) രണ്ട് വൃക്കകള്‍, കരള്‍, രണ്ട് നേത്രപടലം എന്നിവയാണ് ദാനം ചെയ്തത്. ഒരു വൃക്ക കോട്ടയം സര്‍ക്കാര്‍ മെഡിക്കല്‍ കോളേജിലേക്കും മറ്റൊരു വൃക്ക അമൃത ആശുപത്രിയിലേക്കും ഒരു കരള്‍ കോട്ടയം കാരിത്താസ് ആശുപത്രിയിലേക്കും രണ്ട് നേത്രപടലങ്ങള്‍ കോട്ടയം ചൈതന്യ കണ്ണാശുപത്രിയിലേക്കുമാണ് നല്‍കിയത്.  തീവ്രദുഃഖത്തിലും അവയവം ദാനം ചെയ്യാന്‍ സന്നദ്ധരായ ബന്ധുക്കളെ ആരോഗ്യ വകുപ്പ് മന്ത്രി വീണാ ജോര്‍ജ് നന്ദി അറിയിച്ചു.  റോസമ്മ ഉലഹന്നാന് ആദരാഞ്ജലികള്‍ അര്‍പ്പിക്കുകയും കുടുംബത്തിന്റെ ദുഃഖത്തില്‍ പങ്കുചേരുന്നതായും മന്ത്രി പറഞ്ഞു.

 സ്റ്റേറ്റ് ഓര്‍ഗന്‍ ആന്‍ഡ് ടിഷ്യു ട്രാന്‍സ്പ്ലാന്റ് ഓര്‍ഗനൈസേഷനന്റെനേതൃത്വത്തിലാണ് അവയവദാന നടപടിക്രമങ്ങളും ഏകോപനവും പൂര്‍ത്തിയായത്.   നവംബര്‍ അഞ്ചിന് രാത്രി 10.30ന് കടയിലെ ജോലി കഴിഞ്ഞ് ഭര്‍ത്താവ് ഉലഹന്നാന്‍ ജോസിനൊപ്പം ഓട്ടോറിക്ഷയില്‍ വീട്ടിലേക്ക് മടങ്ങുന്നതിനിടയിലാണ് അപകടമുണ്ടായത് . യാത്രാമധ്യേ, പാല സിവില്‍ സ്റ്റേഷനിന് സമീപം ഉലഹന്നാന്‍ ജോസ് സാധനങ്ങള്‍ വാങ്ങാനായി ഓട്ടോറിക്ഷ നിര്‍ത്തിയിട്ട സമയത്ത്,  ഓട്ടോയുടെ പിന്നില്‍ കാര്‍ ഇടിക്കുകയായിരുന്നു. പാലാ സ്വദേശി  ആനിത്തോട്ടം ജോര്‍ജുകുട്ടിയുടെ കാറാണ് റോസമ്മയെ ഇടിച്ചിട്ടതിനുശേഷം നിര്‍ത്താതെ  പോയത്. വാഹനം ഓടിച്ച് നിര്‍ത്താതെ പോയ ജോര്‍ജ്ജകുട്ടി ആനിത്തോട്ടം നിലവില്‍ ഒളിവിലാണ്. ഇയാള്‍ക്ക് വേണ്ടി പോലീസ് ഊര്‍ജ്ജിത അന്വേഷണം നടത്തിവരികയാണ്. ഡമ്മിയായി ഹാജരായ ഭരണങ്ങാനം സ്വദേശിയായ മനു എന്നയാള്‍ക്കെതിരെ ആള്‍മാറാട്ടത്തിന് പോലീസ് കേസെടുത്തിരുന്നു. ഇയാളെ സ്റ്റേഷന്‍ ജാമ്യത്തില്‍ വിട്ടു.