തിരുവാതിര താലപ്പൊലി മഹോത്സവം ഡിസംബര്‍ 27, 28 തീയതികളില്‍

ഏഴാച്ചേരി കാവിന്‍പുറം ഉമാമഹേശ്വര ക്ഷേത്രത്തിലെ തിരുവാതിര താലപ്പൊലി മഹോത്സവം ഡിസംബര്‍ 27, 28 തീയതികളില്‍ നടക്കും.  ഉത്സവാഘോഷ ചടങ്ങുകള്‍ക്ക് ക്ഷേത്രം തന്ത്രി പെരിയമന നാരായണന്‍ നമ്പൂതിരി, മേല്‍ശാന്തി വടക്കേല്‍ ഇല്ലം നാരായണന്‍ നമ്പൂതിരി എന്നിവര്‍ മുഖ്യകാര്‍മ്മികത്വം വഹിക്കും.  ഡിസംബര്‍ 27ന് രാവിലെ  7 മുതല്‍  വിശേഷാല്‍ നവഗ്രഹപൂജ, 8.30 ന് കലവറ നിറയ്ക്കല്‍, 9.30 ന് വിദ്യാഗോപാല മന്ത്രാര്‍ച്ചന എന്നിവ നടത്തും. 10.30 ന് ശ്രീഭദ്ര നാരായണീയ സമിതിയുടെ  നാരായണീയ സദസ്സ് നടക്കും. 11.30 ന് അയ്മനം വേണുഗോപാലിന്റെ സോപാന സംഗീതം, 12.30 ന് പ്രസാദമൂട്ട്. എന്നിവ നടക്കും.

ഉച്ചയ്ക്ക് 1 ന് തിരുവാതിരകളി വഴിപാടും മത്സരവും ആരംഭിക്കും. മീനച്ചില്‍ താലൂക്ക് എന്‍.എസ്.എസ്. യൂണിയന്‍ ചെയര്‍മാന്‍ മനോജ് ബി. നായരും പത്നി പ്രീത മനോജും ചേര്‍ന്ന് തിരുവാതിരകളി വഴിപാട് മത്സരം ഉദ്ഘാടനം ചെയ്യും. ദേവസ്വം പ്രസിഡന്റ് റ്റി.എന്‍. സുകുമാരന്‍ നായര്‍ അദ്ധ്യക്ഷത വഹിക്കും. 

മത്സരത്തില്‍ ഒന്നാം സമ്മാനം നേടുന്ന തിരുവാതിരകളി സംഘത്തിന് 12,222 രൂപയും രണ്ടാം സമ്മാനം ലഭിക്കുന്ന ടീമിന് 6,666 രൂപയും മൂന്നാം സ്ഥാനം ലഭിക്കുന്ന ടീമിന് 4,444 രൂപ ക്യാഷ് അവാര്‍ഡും എവര്‍റോളിംഗ് ട്രോഫിയും നല്‍കും.  വൈകിട്ട് 6.30 ന് വിശേഷാല്‍ ദീപാരാധന, 7 ന് കുട്ടികളുടെ ഡാന്‍സ്, 7.15 ന് മ്യൂസിക് ഫ്യൂഷന്‍, രാത്രി 8 ന് മഹാപ്രസാദമൂട്ട്, 8.30 ന് കിരാതപെരുമാള്‍ ബാലെ. 28ന് രാവിലെ , 7മുതല്‍ ഉദയാസ്തമന പൂജ, 9.30 മുതല്‍ പൂഞ്ഞാര്‍ ശ്രീകൃഷ്ണ നാരായണീയ സമിതി അവതരിപ്പിക്കുന്ന ദേവീ നാരായണീയ പാരായണം, 12.30 ന് ഓട്ടന്‍തുള്ളല്‍ - ദിഗ്സാ എസ്. നമ്പ്യാര്‍, 1 ന് മഹാപ്രസാദമൂട്ട്, എന്നിവ നടക്കും വൈകിട്ട് 7 ന് താലപ്പൊലി ഘോഷയാത്ര ആരംഭിക്കും.  ഏഴാച്ചേരി വടക്ക് കൊടുങ്കയത്തില്‍ നിന്നും തെക്ക് അമ്പാട്ടുവടക്കേതില്‍ നിന്നും  ആരംഭിക്കുന്ന ഘോഷയാത്രകള്‍  കാവിന്‍പുറം ജംഗ്ഷനില്‍ ഒത്തുചേര്‍ന്ന് മഹാഘോഷയാത്രയായി ക്ഷേത്രത്തിലേക്ക് നീങ്ങും. തുടര്‍ന്ന് വിശേഷാല്‍ ദീപാരാധനയും വലിയ കാണിക്കയും താലപ്രസാദ ഉണ്ണിയപ്പ വിതരണവും, താലസദ്യയും നടത്തും. 9 മുതല്‍ നാടകം. വാര്‍ത്താസമ്മേളനത്തില്‍ കാവിന്‍പുറം ദേവസ്വം ഭാരവാഹികളായ റ്റി.എന്‍. സുകുമാരന്‍ നായര്‍, ചന്ദ്രശേഖരന്‍ നായര്‍ പുളിക്കല്‍, ജയചന്ദ്രന്‍ വരകപ്പള്ളില്‍, സി.ജി. വിജയകുമാര്‍, ആര്‍. സുനില്‍കുമാര്‍ എന്നിവര്‍ പങ്കെടുത്തു.