കുടുംബശ്രീ ജില്ലാതല കലാജാഥയ്ക്ക് പ്രവിത്താനത്ത് സ്വീകരണം നല്കി

കുടുംബശ്രീ 'നയിചേതന 4.0-ഉയരെ' ജെന്‍ഡര്‍ ക്യാമ്പയിന്റെ ഭാഗമായി സംഘടിപ്പിക്കുന്ന ജില്ലാതല കലാജാഥയ്ക്ക് പ്രവിത്താനത്ത് സ്വീകരണം നല്കി. കുടുംബശ്രീയുടെ കമ്യൂണിറ്റി തിയേറ്റര്‍ ഗ്രൂപ്പായ രംഗശ്രീ സംസ്ഥാന കണ്‍സോര്‍ഷ്യത്തില്‍ അംഗങ്ങളായ വനിതകളാണ് സംസ്ഥാനമൊട്ടാകെ കലാജാഥ അവതരിപ്പിക്കുന്നത്.  ലിംഗസമത്വം, ലിംഗാവബോധം, സ്ത്രീകളുടെ തൊഴില്‍ പങ്കാളിത്തം വര്‍ധിപ്പിക്കേണ്ടതിന്റെ ആവശ്യകത, കുടുംബശ്രീ മുഖേന സ്ത്രീകള്‍ക്കും കുട്ടികള്‍ക്കും ലഭ്യമാക്കുന്ന വിവിധ പിന്തുണാ സംവിധാനങ്ങള്‍ എന്നിവ സംബന്ധിച്ച് കലാജാഥയിലൂടെ ബോധവല്‍ക്കരണം നടത്തുകയാണ് ലക്ഷ്യം.  കോട്ടയം പായിപ്പാട് നാല് കോടി ജംഗ്ഷനില്‍ നിന്നുമാണ് ജാഥ ആരംഭിച്ചത്. 

പ്രവിത്താനത്ത് കലാജാഥയുടെ ജില്ലാതലസമാപനം ഉദ്ഘാടനം ളാലം ബ്ലോക്ക് പഞ്ചായത്ത് പ്രസിഡന്റ് ജോസ് ജോസഫ് പ്ലാക്കൂട്ടം നിര്‍വഹിച്ചു.  ഭരണങ്ങാനം പഞ്ചായത്ത് പ്രസിഡന്റ് സുധാ ഷാജി അധ്യക്ഷയായിരുന്നു. ബ്ലോക്ക് പഞ്ചായത്ത് അംഗം സിസി ജെയിംസ്,  പഞ്ചായത്ത് വൈസ് പ്രസിഡന്റ് ജിജി ഈറ്റയ്ക്കക്കുന്നേല്‍,  പഞ്ചായത്ത് അംഗങ്ങളായ അനുമോള്‍ കെ, എല്‍സമ്മ ജോര്‍ജ്ജുകുട്ടി,  വിനോദ് വേരനാനി, കെറ്റി തോമസ്, വിജയന്‍ രാഘവന്‍, മറ്റ് അംഗങ്ങള്‍, പ്രവിത്താനം വ്യാപാരി വ്യവസായി ഏകോപനസമിതി പ്രസിഡന്റ് സജി എസ് തെക്കേല്‍,  കുടുംബശ്രീ പ്രവര്‍ത്തകര്‍ തുടങ്ങിയവര്‍ സംബന്ധിച്ചു.