ഏറ്റുമാനൂരിനെ മാതൃകാ നിയോജകമണ്ഡലം ആക്കി മാറ്റുവാന്‍ മന്ത്രി വി.എന്‍ വാസവന് കഴിഞ്ഞതായി ജോസ് കെ മാണി എം.പി

ഏറ്റുമാനൂര്‍ നിയോജകമണ്ഡലത്തെ മാതൃകാ നിയോജകമണ്ഡലം ആക്കി മാറ്റുവാന്‍ ഏറ്റുമാനൂര്‍ എംഎല്‍എയും മന്ത്രിയുമായ വി.എന്‍ വാസവന് കഴിഞ്ഞതായി ജോസ് കെ മാണി എം.പി പറഞ്ഞു. 4100 കോടി രൂപയുടെ വികസന പ്രവര്‍ത്തനങ്ങള്‍ ആണ് മണ്ഡലത്തില്‍ സമയ ബന്ധിതമായി നടത്തിയതെന്നും അദ്ദേഹം പറഞ്ഞു. ജോസ് കെ മാണി എം.പി നയിക്കുന്ന എല്‍ഡിഎഫ് മധ്യമേഖല വികസന മുന്നേറ്റ ജാഥയ്ക്ക് ഏറ്റുമാനൂരില്‍ നല്‍കിയ സ്വീകരണ യോഗത്തില്‍ സംസാരിക്കുകയായിരുന്നു ജോസ് കെ മാണി എം.പി. ഏറ്റുമാനൂര്‍ പ്രൈവറ്റ് ബസ് സ്റ്റേഷനില്‍ സംഘടിപ്പിച്ച സ്വീകരണയോഗത്തില്‍ വി എന്‍ വാസവന്‍ അധ്യക്ഷത വഹിച്ചു.

 യോഗത്തില്‍ കെ.കെ ശൈലജ ടീച്ചര്‍ എംഎല്‍എ,സിപിഎം സംസ്ഥാന കമ്മിറ്റി അംഗം അനില്‍കുമാര്‍, സിപിഐ നേതാക്കളായ കെ.കെ ശശിധരന്‍, വി.ബി ബിനു, കെ ഐ കുഞ്ഞച്ചന്‍, കേരള കോണ്‍ഗ്രസ് നേതാക്കളായ ലോപ്പസ് മാത്യു, സ്റ്റീഫന്‍ ജോര്‍ജ് , സിപിഎം ജില്ലാ സെക്രട്ടറി ടി.ആര്‍ രഘുനാഥന്‍ തുടങ്ങിയ നേതാക്കള്‍ പ്രസംഗിച്ചു. ചാവറ കുര്യാക്കോസ് ഏലിയാസ് അച്ചന്‍ സാമൂഹിക പരിഷ്‌കരണത്തിനും വിദ്യാഭ്യാസമേഖലയുടെ മുന്നേറ്റത്തിനുമായി നടത്തിയ പരിശ്രമങ്ങള്‍ കാലം എന്നും ഓര്‍മ്മിക്കുമെന്നും, പള്ളിയോടൊപ്പം പള്ളിക്കൂടം എന്ന ആശയവും ഉച്ചക്കഞ്ഞി വിതരണവും നടപ്പിലാക്കുക വഴി പാര്‍ശ്വവല്‍ക്കരിക്കപ്പെട്ടവര്‍ക്ക് സാമാന്യ വിദ്യാഭ്യാസം ലഭ്യമാക്കുക എന്ന വലിയ ലക്ഷ്യമാണ് ചാവറയച്ചന്‍  നടപ്പിലാക്കിയതെന്ന് മുഖ്യപ്രഭാഷണം നടത്തിയ കെ.കെ ശൈലജ ടീച്ചര്‍ എംഎല്‍എ പറഞ്ഞു. ഏറ്റുമാനൂര്‍ പേരൂര്‍ ജംഗ്ഷനില്‍ നിന്നും വാദ്യമേളങ്ങളുടെയും കരകാട്ടം തെയ്യം തുടങ്ങിയവയുടെയും അകമ്പടിയോടെയാണ് വികസന മുന്നേറ്റ ജാഥയെ ബസ് സ്റ്റേഷനിലേക്ക് എത്തിയത്. വികസന ജാഥയ്ക്ക് വൈകുന്നേരം അഞ്ചിന്  കുറവിലങ്ങാട് സ്വീകരണം നല്‍കി. വികസന മുന്നേറ്റ ജാഥ വൈകിട്ട് ആറിന് വൈക്കത്ത് സമാപിക്കും. തികളാഴ്ച രാവിലെ 10 ന് പാലായില്‍ സ്വീകരണം നല്‍കും.